გრიგოლ ლილუაშვილისთვის აღკვეთის ღონისძიების შეფარდებაზე სასამართლო, სავარაუდოდ, დღეს იმსჯელებს. ადვოკატის განცხადებით, ჯერ მხოლოდ ბრალდების დადგენილებას გაეცნენ. მისივე თქმით, სუს-ის ყოფილი უფროსი სასამართლო პროცესზე დიდი ალბათობით დუმილის უფლებას გამოიყენებს იქამდე, ვიდრე საქმის მასალებს დეტალურად არ გაეცნობა.
რაც შეეხება რომეო მიქაუტაძის ჩვენებს – უფლებადამცველი ადასტურებს, რომ ეკონომიკის მინისტრის ყოფილი მოადგილე დასახელებულია მოწმეთა ბაზაში, თუმცა მისცა თუ არა მან ლილუაშვილის საწინააღმდეგო ჩვენება, ეს ჯერ უცნობია.
“ჩვენ გამოვრიცხავთ პირდაპირი მტკიცებულებების არსებობას, განსაკუთრებით ქრთამის აღების დადასტურების ნაწილში. ბატონი გრიგოლის უდანაშაულობის დამტკიცებას შევძლებთ, ვფიქრობთ….არ მგონია, რომ დღეს მკვეთრი და განსაკუთრებული განცხადებები გაკეთდეს, თუნდაც სასამართლო პროცესზე….მიქაუტაძე დასახელებულია მოწმეთა ბაზაში, მაგრამ რა სახის ჩვენება აქვს მიცემული, ამას ჩვენ არ ვიცნობთ. საკმაოდ დიდია ბაზათა წრე… არ ილაპარაკებს მომხდარ დანაშაულის დეტალებზე ზეპირად, სანამ არ გაეცნობა საქმის მასალებს. [ტვ პირველი] | ამბობს ადვოკატი რობერტ გრიგალაშვილი.
შეგახსენებთ, გრიგოლ ლილუაშვილი 23 დეკემბერს დააკავეს. პროკურატურა მას ინვესტორებისგან განსაკუთრებით დიდი ოდენობით ქრთამის აღებასა და ქოლ-ცენტრების მფარველობას ედავება. ლილუაშვილს 11-დან 15 წლამდე პატიმრობა ემუქრება. სუს-ის ყოფილი უფროსი წარდგენილ ბრალს არ აღიარებს.