მსახიობმა, მწერალმა, მოცეკვავემ გივი სიხარულიძემ “ჯორჯიან თაიმსი”-ს გადაცემაში “ჩაი” პოეტი რეზო ამაშუკელი გაიხსენა, რომელიც ცოტა ხნის წინ გარდაიცვალა და განაცხადა, რომ ის მთაწმინდის პანთეონში უნდა დაეკრძალათ.
სიხარულიძემ ისიც თქვა, რომ რეზო ამაშუკელის მხრიდან საზოგადოების გარკვეული ნაწილის მისამართით აგრესიული ტიპის დამოკიდებულება არ მოსწონდა.
“ძალიან გულდაწყვეტილი ვარ რეზო ამაშუკელზე, ის იყო ქურუმი ამ დროის პოეზიის. ბოდიშს ვიხდი, თუ გინდა სულ შემიზიზღოს ხალმა, მაგრამ რეზო ამაშუკელს სამგლოვიარო პროცესიიდან დაწყებული, წმინდა მიწასთან მიბარებით დამთავრებული არასწორად მოიქცნენ. ეს იმას ნიშნავს, რომ თუ ვინმეს ეკუთვნოდა მთაწმინდაზე დაკრძალვა, როგორც პოეტს, ის ნამდვილად უნდა დაეკრძალათ მთაწმინდის პანთეონში. ამას არავინ არ იტყოდა ჩემ გარდა, იმიტომ, რომ ყველა საკუთარ თავს უფრთხილდება. მზად ვარ, როგორც არ უნდა იყოს, გინებსაც მივიღებ…
მეც არ მომწონდა ბევრი რამე მის ხასიათში და რა თქმა უნდა, იმ ხალხს, რომლებიც მას აგინებს, მათ ვერაფერს ვეტყვი იმიტომ, რომ მან (რეზო ამაშუკელმა) თავისი აგრესიული დამოკიდებულებით ამ ხალხთან შექმნა საფუძველი, გინება რომ დაუწყეს. ეს ხალხის ბრალი არ არის, ისიც არ იქცეოდა სწორად. იმას ვამბობ, რომ როცა ღმერთმა ასეთ პოეტად მოგავლინა, ხალხის სიყვარულიც უნდა შეენარჩუნება, მან ეს ვერ შეძლო.
მივმართავ კულტურის სამინისტროს, მთავრობას და ყველას, როგორც არ უნდა დაეწერა მას, რომ არ სურდა მთაწმინდის პანთეონში დაკრძალვა, ეს არ უნდა ექნათ, რადგან მისი პოეზია იმსახურებდა – მთაწმინდის პანთეონს! ამას ვიტყვი, ყველგან, ყოველთვის, მაგრამ კიდევ ერთხელ ვამბომ, ბოლო წლებში მისი ხალხისადმი დამოკიდებულება არ მომწონდა, როცა ამხელა პოეტი ხარ ხალხის სიყვარულს უნდა გაუფრთხილდე“, – განაცხადა გივი სიხარულიძემ “ჯორჯიან თაიმსი”-ს ეთერში საუბრისას.
https://mix.metronome.ge/25258-2/