უკრაინის პრეზიდენტი ვოლოდიმირ ზელენსკი აცხადებს, რომ 20 პუნქტისგან შემდგარ სამშვიდობო გეგმაზე მუშაობა დასკვნით ეტაპზეა და ძალიან მალე დოკუმენტს ამერიკულ მხარეს გადასცემენ, – ამის შესახებ ზელენსკიმ სოციალურ ქსელებში დაწერა.
„დღეს განრიგში საუბარია ამერიკულ მხარესთან დოკუმენტთან დაკავშირებით, რომელიც ეხება ომის შემდეგ უკრაინის აღდგენისა და ეკონომიკური განვითარების პროცესის დეტალებს. პარალელურად, ვასრულებთ მუშაობას ფუნდამენტური დოკუმენტის 20 პუნქტზე, რომელმაც შესაძლოა, განსაზღვროს ომის დასრულების პარამეტრები და ვიმედოვნებთ, უახლოეს დროში დოკუმენტს შეერთებულ შტატებს გადავცემთ პრეზიდენტ ტრამპის გუნდთან და ევროპელ პარტნიორებთან ჩვენი ერთობლივი მუშაობის შემდეგ“, – წერს ზელენსკი.
უკრაინის პრეზიდენტის თქმით, ის პარტნიორებთან ერთად ძალიან პროდუქტიულად მუშაობს მომავალი უსაფრთხოების უზრუნველყოფაზე და რუსეთის აგრესიის განმეორების დაუშვებლობაზე.
ზელენსკიმ აღნიშნა, რომ ხვალ მას დაგეგმილი აქვს „მსურველთა კოალიციასთან“ შეხვედრა.
მისი ცნობით, ახლა განიხილება საკვანძო საკითხები – როგორ უნდა აიძულონ რუსეთი, შეწყვიტოს მკვლელობები და კონკრეტულად რა შეაკავებს რუსეთს მესამე ინტერვენციისგან.
ზელენსკიმ აღნიშნა, რომ მიმდინარე კვირაში შეიძლება იყოს კარგი სიახლეები სისხლის ღვრის დასრულებასთან დაკავშირებით.
„ვაგრძელებთ ყოველდღიურ, პრაქტიკულად 24/7-ზე კომუნიკაციას ჩვენს ყველა პარტნიორთან, რათა განვსაზღვროთ ომის დასრულების ქმედითი და რეალისტური ნაბიჯები. ყველაფერი უნდა გაკეთდეს საიმედოდ და ღირსეულად უკრაინისთვის“, – წერს ზელენსკი.