საქართველოს მთავრობა არსენალის მთაზე სამთავრობო ქალაქის მშენებლობას გეგმავს. მუნიციპალური განვითარების ფონდის მიერ გამოცხადებული პროექტირების ბაზრის მოკვლევის თანახმად, ადგილზე გადავლენ როგორც სამინისტროები, ასევე თბილისის მერია, მთავრობის ადმინისტრაცია და საქართველოს პარლამენტი.
პროექტთან დაკავშირებით პირველი კომენტარი გააკეთა ირაკლი კობახიძემ, რომლის თქმითაც ადმინისტრაციული შენობების ჩანაცვლების პროექტის ფარგლებში კონკრეტული სამინისტროების შენობები გაიყიდება.
“კონკრეტული უწყებების შენობები შეიძლება გასხვისდეს, რათა იგივე ფასად ჩვენ მივიღოთ ახალი შენობა, რაც ზოგადად უზრუნველყოფს ეკონომიკურ აქტივობას. ახალი შენობების მშენებლობა შეუწყობს ეკონომიკურ აქტივობას და განვითარებას. მეორე მხრივ საინვესტიციო მიზნებით როდესაც მოხდება კონკრეტული ობიექტების გასხვისება ესეც ხელს შეუწყობს ხელს ეკონომიკურ აქტივობას, რაც დამატებით შეუწყობს ხელს ეკონომიკურ აქტივობას”- განაცხადა ირაკლი კობახიძემ.
მთავრობა თავდაპირველად სამთავრობო ქალაქის მშენებლობას ორთაჭალაში გეგმავდა, თუმცა როგორც ირკვევა, პროექტის მისამართმა არსენალის მთაზე გადაინაცვლა, სადაც მთავრობას 77 ჰექტარის მიწის ნაკვეთი ეკუთვნის და ეს ტერიტორია თბილისის ფარგლებში ერთ-ერთი უმსხვილესი ზონაა, რომელიც სახელმწიფო საკუთრებაშია.
მუნიციპალური განვითარების ფონდის მიერ გამოცხადებული ბაზრის მოკვლევის თანახმად, პროექტის ფარგლებში სულ 282,750 კვადრატული მეტრის ახალი საოფისე და ადმინისტრაციული ნაგებობები უნდა აშენდეს. მათ შორის უნდა მოეწყოს ღონისძიებების გასამართი არანაკლებ 10,000 კვადრატული მეტრის მისაღები სივრცეც. ჩამოთვლილ ობიექტებს შორის ყველაზე დიდი იქნება თბილისის მერია 59,900 კვადრატული მეტრის ფართობით, პარლამენტის შენობისთვის კი 31,350 კვადრატული მეტრის საოფისე შენობა იქნება გათვალისწინებული.