„შეკრებებისა და მანიფესტაციების შესახებ“ კანონის კიდევ გამკაცრებს გამოეხმაურა თენგიზ შარმანაშვილი.
“ქვეყანაში არსებობს რეალურად 300 კაცის პროტესტი, რომლებიც თავს ახვევენ თავის მოქმედებებს მთელ საქართველოს, აფერხებენ მოქალაქეთა გადაადგილებას, როცა ამის საჭიროება არ არსებობს. 300 კაცი არ არის უფლებამოსილი თავისი დღის წესრიგით ატრიალოს მთელი ქვეყანა და შელახოს სხვათა უფლებები თავის ჭკუაზე. თუ ისინი მოიპოვებენ იმ მხარდაჭერას და იმ დღეს კონკრეტულად შეიკრიბება ის რაოდენობა, სადაც აუცილებელი იქნება ამ გზების გადაკეტვა, პოლიცია ხელს შეუწყობს” -თქვა თენგიზ შარმანაშვილმა ჟურნალისტებთან.
გუშინ ცნობილი გახდა, რომ ოცნება „შეკრებებისა და მანიფესტაციების შესახებ“ კანონს კიდევ ამკაცრებს. ცვლილებები შედის “ადმინისტრაციულ სამართალდარღვევათა კოდექსშიც“. ამ ინიციატივას პარლამენტი დაჩქარებული წესით განიხილავს. საკანონმდებლო ცვლილებათა პაკეტი, გულისხმობს, რომ ხალხის მოძრაობის ადგილას, ტროტუარებზე აქციის გამართვას შსს-ს წინასწარი გაფრთხილება იქნება საჭირო.
პროექტის თანახმად, თუ შეკრება-მანიფესტაცია საფრთხეს უქმნის საზოგადოებრივ უსაფრთხოებას, მართლწესრიგს, დაწესებულებებისა და ორგანიზაციების ნორმალურ ფუნქციონირებას, სატრანსპორტო საშუალებებისა და ხალხის გადაადგილებას, სახელმწიფო ორგანო უფლებამოსილი იქნება მანიფესტაციის მონაწილეებს მანიფესტაციის ჩატარების ალტერნატიული ადგილის, დროის ან სვლაგეზის შესახებ მითითება მისცეს. აღნიშნული მითითების შეუსრულებლობა პასუხისმგებლობის დაკისრებას გამოიწვევს.