იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხეიძე განცხადებას ავრცელებს და გრიპის ვირუსის სეზონის ნაადრევად დადგომაზე საუბრობს.
ასევე განსაკუთრებით ყურადღებას ამახვილებს რისკ ჯგუფებზე, კონკრეტულად კი მცირეწლოვან ბავშვებზე და ამბობს, რომ ვირუსის პიკი თებერვლის მაგივრად იანვრის მეორე ნახევრისთვის დადგება.
“გრიპის სეზონი აქტიურ ფაზაში შედის. თუ შევადარებთ ბოლო 5 წლის სტატისტიკას, პირველი შემთხვევები წელს ცოტათი ადრე გამოჩნდა. ამიტომ ჩვენთვის ერთი განმასხვავებელი ამ ვირუსებისა არის ის, რომ ადრე დაიწყო შემთხვევების დაფიქსირება და მეორე შესაძლოა, აქედან გამომდინარე, ადრე გამოვლინდეს ამ ვირუსების მატების პიკი. სტატისტიკის მიხედვით, 2024- 2025 წლის სეზონზე პიკი მოდიოდა მაქსიმუმ თებერვლის მეორე კვირაზე, წელს შესაძლოა ეს პერიოდი გაცილებით ადრე, დეკემბრის მეორე ნახევარში ან იანვრის პირველ ნახევარში დადგეს… პირველი და ყველაზე ხშირი გამომწვევი გრიპის სხვადასხვა ტიპის ვირუსებს შორის 2025-2026 წლის სეზონზე არის H3N2 ტიპის ვირუსი. ზოგადად, როდესაც გრიპის ვირუსზე ვსაუბრობთ აქცენტი გვაქვს A ტიპის ვირუსზე ან B ტიპის ვირუსზე. A ტიპის ვირუსს რაც შეეხება ჩვენთვის კარგად ნაცნობია H5N1 ტიპის ვირუსი, ე.წ. ღორის გრიპი და ამავდროულად მეორე ყველაზე ხშირი გამომწვევი H3N2 ტიპის ვირუსი…
გრიპის ვირუსთან მიმართებით არსებობს რისკის ჯგუფები. 5 წლამდე ასაკის ბავშვები სწორედ რისკის ჯგუფში შედიან. რა თქმა უნდა, აქედან გამომდინარე, მომართვა როგორც ამბულატორიულ რგოლში, ისე სტაციონარულში, ძირითადად განპირობებული იქნება 5 წლამდე ასაკის ბავშვების ავადობით…
როდესაც მომართვაზე ვსაუბრობთ, სტაციონარულ რგოლში, ძირითადი მიზეზი არის გრიპისთვის დამახასიათებელი ისეთი გართულება, როგორიც არის ფილტვების ანთება. ჩვენს კლინიკაში მომატებულია მომართვა ოქტომბერთან შედარებით. ამ მომართვის უკან დგას ფილტვების ანთების ძალიან ბევრი შემთხვევა. დილის მონაცემებით, 32 ბავშვია, რომელიც მკურნალობს სასუნთქი სისტემის სხვადასხვა მწვავე დაავადების დიაგნოზით, მათ შორის 8 ბავშვთან დადგენილია ფილტვების ანთება. ეს გულისხმობს დაავადების უფრო მძიმე მიმდინარეობს, უფრო ინტენსიური მკურნალობის საჭიროებას”