“სავსებით შესაძლებელია, რომ ეს ახალი კვანძი სწორედ იმ ნივთირებით იყოს გამოწვეული, რომელსაც ადამიანების დასაშლელად იყენებდნენ” – მიხეილ რამიშვილი “მეტრონომთან”

ადვოკატმა მიხეილ რამიშვილმა მეტრონომთან საუბრისას აღნიშნა, რომ მისი ჯანმრთელობის მდგომარეობის გართულების მიზეზი შესაძლოა BBC-ის გამოძიებაში ნახსენები ნივთიერება –  ტრიქლორეთილენი იყოს. ადვოკატის თქმით, სრულიად შესაძლებელია, რომ ახალი სიმსივნური კვანძის წარმოქმნაც სწორედ ამ ნივთიერებით იყოს გამოწვეული, რადგან ამ ადგილზე არასოდეს ჰქონია პრობლემა და მუდმივად იმყოფებოდა სამედიცინო კონტროლის ქვეშ.

რაამიშვილის შეფასებით, ეს მოქმედება დასჯის ერთ-ერთი მექანიზმია. ამის გამო მას ადგილობრივ დონეზე შესაბამისი გამოძიების ჩატარების იმედი არ აქვს.

“მინიმუმ ერთი „ბალონი“ მთლიანად დამაცალეს, ფოტოშიც ჩანს ეს. ამის შემდეგ მინიმუმ ორი კვირის განმავლობაში მთელი სხეული მეწვოდა, მომიწია ცივი წყლის გამოყენება, რამაც გარკვეულწილად ჩემი მხედველობის მდგომარეობაზეც იმოქმედა, გადაადგილებისას თავბრუსხვევაც მქონდა. ამის გამო ემიგრაციაში წამოვედი, სადაც დეტალური გამოკვლევების ჩატარების შემდეგ ჩემს ერთადერთ თირკმელზე ახალი სიმსივნური კვანძი აღმომაჩნდა.

სავსებით შესაძლებელია, რომ ეს ახალი კვანძი სწორედ იმ ნივთირებით იყოს გამოწვეული, რომელსაც ადამიანების დასაშლელად იყენებდნენ, რადგან ამ ადგილას არასოდეს არ მქონია პრობლემა, მუდმივად სამედიცინო კონტროლის ქვეშ ვიყავი. შეუძლებელია ადამიანების დასაშლელად გამოყენებულ საშუალებებს ასეთი მძიმე უკუჩვენებები და გართულებები მოჰყვეს.

გამოძიების იმედი, ბუნებრივია, არ მაქვს, თუ ეს არ იქნება საერთაშორისო გამოძიება. ადგილობრივ გამოძიებას აზრი არ აქვს — ჩვენთან სამართლებრივი სისტემა ფაქტობრივად არ არსებობს. ესაა დასჯის მექნიზმი, ბოლოს ვინ დაისჯება, მაგასაც ვნახავთ.” – ამბობს “მეტრონომთან” მიხეილ რამიშვილი.

შეგახსენებთ, რომ BBC-ის გამოძიების მიხედვით, საქართველოს ხელისუფლებამ გასულ წელს აქციების დასაშლელად წყლის ჭავლებში პირველი მსოფლიო ომის დროინდელი ქიმიური ნივთიერება – „კამიტე“ გამოიყენეს. დემონსტრანტები ჰყვებოდნენ, რომ ჭავლი „კანს წვავდა“, ხოლო ხველა, გულისრევა და სუნთქვის გაძნელება კვირეობით არ გადიოდა.