“ვარაუდი არის ის, რომ ეს არის ხელისუფლების მიერ მოწყობილი პროვოკაცია” – ამის შესახებ ალეკო ელისაშვილის ადვოკატი, გიორგი რეხვიაშვილი ელისაშვილის დაკავებიდან პირველ კომენტარს ავრცელებს.
ადვოკატის თქმით, ეს ყოველივე იმდენად აბსურდულია, რომ დიდი შანსია იყოს ხელისუფლების მოწყობილი პროვოკაცია.
“დეტალური ინფორმაცია არ გვაქვს. შსს-ს ჩანაწერით ვნახეთ, რომ ის არის ნაცემი, გადაყვანილი სავარაუდოდ არის დიღმის სამმართველოში, ჯერ არ ჩაუყვანიათ იზოლატორში რომ შევძლო შეხვედრა და დეტალების გარკვევა, თუ რამ გამოიწვია ეს ყველაფერი და რა იყო რეალურად მიზეზი აღნიშნული ფაქტის. დაცვის მხარის ვარაუდი არის ის, რომ ეს არის ხელისუფლების მიერ მოწყობილი პროვოკაცია იმიტომ, რომ აბსურდულია, როდესაც ადამიანი ცხოვრობს მთაწმინდაზე, დილის ხუთ საათზე მიდიოდეს სასამართლოში და ცდილობდეს ცეცხლის წაკიდებას და შენობის დაწვას, როდესაც ახლო-მახლო მის საცხოვრებელ ადგილზე ბევრი სახელმწიფო დაწესებულებაა. მიზანი თუ ეს იყო ცეცხლის წაკიდება, ბევრი რაღაც შეეძლო გაეკეთებინა სახლთან ახლოს”- ამბობს ალეკო ელისაშვილის ადვოკატი.
შეგახსენებთ, “ლელო ძლიერი საქართველოს” ერთ-ერთი ლიდერის, ალეკო ელისაშვილის დაკავების შესახებ ინფორმაცია დღეს დილით გავრცელდა. მოგვიანებით შსს-მ განცხადება და ვიდეომასალა გაავრცელა. უწყება ამბობს, რომ პოლიტიკოსმა თბილისის საქალაქო სასამართლოს კანცელარიის შენობის დაწვა სცადა და იარაღით წინააღმდეგობა გაუწია მანდატურს, რის შედეგადაც თავადაც მიიღო დაზიანებები, მანდატური კი კლინიკაში გადაიყვანეს.