“გამოდით გარეთ, დაგვიდექით გვერდით” – სინდისის პატიმრების ოჯახის წევრები მოქალაქეებს მოუწოდებენ, 28 ნოემბერს დაგეგმილ საპროტესტო აქციას შეუერთდნენ.
აქციაზე დაკავებული ახალგაზრდების მშობლები ამბობენ, რომ მათი შვილების და პოლიტიკური პატიმრების თავისუფლებისთვის, ევროპული მომავლისთვის ბოლომდე იბრძოლებენ.
“28 ნოემბერი არის ერთ-ერთი ყველაზაე მძიმე და ბნელი დღე საქართველოს ისტორიაში. მთელი ერთი წელია, ჩვენ ვდგავართ ქუჩაში და ვიბრძვით ჩვენი ქვეყნის მომავლისთვის, დამოუკიდებლობისთვის, ევროპული მომავლისთვის და ჩვენი შვილების თავისუფლებისთვის.
მოგიწოდებთ ყველას, 28 ნოემბერს, 19:00 საათზე შევიკრიბოთ თბილისის სახელმწიფო უნივერსიტეტის ეზოში და შემდეგ პროტესტით და მარშით წავიდეთ რუსთაველისკენ.
გვინდა დაგვიდგეთ გვერდით, რომ შევძლოთ უამრავი პოლიტიკური პატიმრისა და პოლიტიკური ტყვის გათავისუფლება. ჩვენ თქვენი იმედი გვაქვს. ჩვენ არ გავჩერდებით, ვიბრძოლებთ, ვიდრე არ იქნება გამარჯვება, ვიდრე არ იქნება გარანტირებული ჩვენი ქვეყნის დამოუკიდებლობა და ვიდრე არ იქნება შეუქცევადი ჩვენი ქვეყნის ევროპული მომავალი”. – განაცხადა ზვიად ცეცხლაძის მამამ, ზურაბ ცეცხლაძემ.