საქართველოს სტატისტიკის ეროვნული მონაცემებით, 2025 წლის III კვარტალში საქართველოში უმუშევრობის დონე წინა წლის შესაბამის პერიოდთან შედარებით 0.5%-ით შემცირდა და 13.3% იყო.
2025 წლის III კვარტალში წინა წლის შესაბამის პერიოდთან შედარებით დაქირავებულთა რაოდენობა გაიზარდა 0.9 ათასი კაცით (0.1%) და 975.3 ათასს მიაღწია, ხოლო თვითდასაქმებულთა რაოდენობა 14.3 ათასით შემცირდა (3.3%) და 418.4 ათასი შეადგინა. ამავე პერიოდში უმუშევართა რაოდენობა შემცირდა 12.1 ათასით (5.4%) და 213.7 ათასი შეადგინა.
საქსტატის ცნობით, სამუშაო ძალის წილი 15 წლის და უფროსი ასაკის მოსახლეობაში წინა წლის შესაბამის პერიოდთან შედარებით 0.1%-ით შემცირდა და 54.5% იყო. ხოლო დასაქმების დონე გაიზარდა 0.2%-ით და 47.3% შეადგინა.
სამუშაო ძალის მონაწილეობის დონე შემცირებულია ქალაქის ტიპის დასახლებებში 0.2%-ით, ხოლო სოფლის ტიპის დასახლებებში გაზრდილია 0.1%-ით. დასაქმების დონე ქალაქის ტიპის დასახლებებში შემცირებულია 0.8%-ით, ხოლო სოფლის ტიპის დასახლებებში გაზრდილია 1.6%-ით და შესაბამისად 47.9%-სა და 46.5%-ს შეადგენს.
2025 წლის III კვარტალში, წინა წლის შესაბამის პერიოდთან შედარებით, უმუშევრობის დონე საქალაქო ტიპის დასახლებებში გაზრდილია 1.1%-ით, ხოლო სოფლის ტიპის დასახლებებში შემცირებულია 3%-ით.
უწყების ინფორმაციის თანახმად, უმუშევრობის დონე ტრადიციულად მაღალია კაცებში, ქალებთან შედარებით. 2025 წლის III კვარტალში, წინა წლის შესაბამის პერიოდთან შედარებით, აღნიშნული მაჩვენებელი ქალებში შემცირებულია 0.1%-ით და 11.4%-ს შეადგენს, ხოლო კაცებში – 0.9%-ით და 14.7%-ია.