ეგ ფილმი უკვე ნანახი გვაქვს – ცრუ ინფორმაციები და კამპანია იყო გაჩაღებული. მიხეილ სააკაშვილი ჯანმრთელი იყო და იგონებდნენ სხვადასხვა თემას,- ამის შესახებ „ქართული ოცნების“ გენერალურმა მდივანმა, კახა კალაძემ განაცხადა, რითაც უპასუხა შეკითხვას, როგორ შეაფასებს უკრაინის პრეზიდენტის ოფისის ხელმძღვანელის მრჩევლის მიხაილო პოდოლიაკის განცხადებას, რომ „მიხეილ სააკაშვილის უკრაინაში წაყვანა მათი დღის წესრიგის ნაწილია“.
მისივე თქმით, მიხეილ სააკაშვილთან დაკავშირებით თვეები მიმდინარეობდა ცრუ კამპანია, სადაც ჩართული იყო უამრავი სხვადასხვა ქვეყნის წარმომადგენელი.
„ეს ფილმი უკვე ვნახეთ, როდესაც თვეები მიმდინარეობდა ცრუ კამპანია, რომელშიც უამრავი სხვადასხვა ქვეყნის წარმომადგენელი და მაღალი თანამდებობის პირი იყო ჩართული. ძალიან მძიმე იყო ეს ყველაფერი ქვეყნისთვის, ქვეყნის რეპუტაციისთვის, როდესაც ცრუ ინფორმაციები და კამპანია იყო გაჩაღებული, რეალურად კი არაფერი ხდებოდა. ჯანმრთელი იყო და იგონებდნენ სხვადასხვა თემებს მასთან დაკავშირებით“-აღნიშნა კახა კალაძემ.
ცნობისთვის, უკრაინის პრეზიდენტის ოფისის ხელმძღვანელის მრჩევლის მიხაილო პოდოლიაკის განცხადებით, სააკაშვილის საქართველოდან გადაყვანის საკითხი უკრაინის დღის წესრიგის ნაწილია, რომელზეც უკრაინა აქტიურად მუშაობს. მან საქართველოს ხელისუფლებას მიმართა, მისცენ უკრაინას საშუალება, რომ სააკაშვილი თუ უკრაინაში არა, სხვა ქვეყანაში მაინც გადაიყვანონ სამედიცინო მიზნებით.