სყოფილმა პრემიერმინისტრმა, ირაკლი ღარიბაშვილმა მისთვის შეფარდებული მილიონლარიანი გირაოს უზრუნველყოფისთვის თბილისში, მოსაშვილის ქუჩაზე მდებარე ბინა ჩადო, რომელშიც ის ცხოვრობს. ამის შესახებ ღარიბაშვილის ადვოკატებმა განაცხადეს.
“ირაკლი ღარიბაშვილის სახლს ყადაღა უზრუნველყოფის ღონისძიების გამოყენების მიზნით დაედო მე, როგორც ადვოკატმა, სასამართლოს შუამდგომლობით მივმართე, რომ იმ უზრუნველყოფის ღონისძიების გამოყენებისთვის, რაც ბატონ ირაკლის შეეფარდა, უძრავი ქონებით ჩანაცვლებულიყო, როგორც ამას კანონი ითვალისწინებს. ყადაღა მხოლოდ ამ ბინას დაედო”. – ღარიბაშვილის ადვოკატმა, ამირან გიგუაშვილმა TV პირველთან სატელეფონო ინტერვიუში ისაუბრა.
“ნამდვილად ჩადო სახლი, რომელშიც ცხოვრობს. ეს სახლი მილიონზე მეტად არის შეფასებული, გადააჭარბა. მხოლოდ ეს ბინა ჩადო, სხვა სახითა და ფორმით რაიმე დაყადაღება არ მომხდარა”. – თქვა ღარიბაშვილის მეორე ადვოკატმა ლილი გელაშვილმა.
შეგახსენებთ, 24 ოქტომბერს ირაკლი ღარიბაშვილს განსაკუთრებით დიდი ოდენობით შემოსავლების ლეგალიზაციის საქმეზე, აღკვეთის ღონისძიების სახით 1 მილიონი ლარის ოდენობით გირაო შეეფარდა. გირაოს გარდა, საბოლოო გადაწყვეტილებამდე, ღარიბაშვილს პასპორტი ჩამოართვეს და ქვეყნიდან გასვლის აკრძალვა დაუწესეს.
ექსპრემიერს პროკურატურამ ბრალდება 24 სექტემბერს წარუდგინა. უწყების ცნობით, ღარიბაშვილი ბრალდებას ეთანხმება.