მედიაში გავრცელდა ინფორმაცია, რომლის თანახმად, რუსული ესტრადის მომღერალი, ალა პუგაჩოვა შესაძლოა საქართველოში ჩამოვიდეს. ამის შესახებ ერთგვარი მინიშნება კულტურის პალატის პრეზიდენტმა დავით ოქიტაშვილმა “ფეისბუქი”-ს პირად გვერდზე გააკეთა და მომღერალთან ერთად გადაღებული ფოტოც გამოაქვეყნა.
“დაგველოდეთ, დიახ.. ეს ისტორიაა, ისტორიას და მეგობრობას, რომელსაც ვერავინ და ვერასდროს ვერ წაშლით”, – წერს ოქიტაშვილი სოციალურ ქსელში.
აღნიშნულ პოსტს საქართველოს პარლამენტის კულტურის კომიტეტის თავმჯდომარე, პიანისტი ელისო ბოლქვაძე გამოეხმაურა, რომელმაც კომენტარებში დაწერა:
ელისო ბოლქვაძე: როდის ეგ ბედნიერი დღე დათო?
დავით ოქიტაშვილი: კიო, დანარჩენი პირადად
ელისო ბოლქვაძე: პირველ რიგებში დამსვა უნდა ხომ იცი?! და მერე გამაცნო ალაჩკა
ინფორმაციის გადასამოწმებლად მეტრონომი თავად დავით ოქიტაშვილს დაუკავშირდა, რომელმაც განაცხადა, რომ ალა პუგაჩოვას საქართველოში ჩამოსვლა ოფიციალური ვიზიტით არ იგეგმება.
“რაღაცაზე ვლაპარაკობდით, გაგვახსენდა და განვათავსე ფოტო “ფეისბუქზე”. დიდი სიამოვნებით ჩამოვიყვან, მაგრამ ეს რომ მოხდეს, წარმოიდგინეთ, საქართველოში რა ამბავი ატყდება… – “ოქიტაშვილი რუსეთის აგენტი” , “ოკუპანტები”, – ეს არის კატეგორია ადამიანებისა, რომლებსაც არაფერი აინტერესებთ. მეგობრობას და ისტორიას ვერავინ წაშლის. მე ვაპირებ, როგორც პირადი სტუმარი ისე ჩამოვიყვანო, კონცერტის გამართვა არ იგეგმება. ვნახოთ რა იქნება, ამაზე არ გვისაუბრია. ჩვენ ერთმანეთს მივულოცეთ ახალი წელი”, – ამბობს მეტრონომთან დავით ოქიტაშვილი.