სასამართლომ ჯგუფური ძალადობის ორგანიზებისა და მასში მონაწილეობის ფაქტზე დაკავებული მანჩო გიორგობიანი პატიმრობაში გაუშვა. გადაწყვეტილება მოსამართლე არსენ კალატოზიშვილმა მიიღო.
პროკურორ გიორგი დოლაკიძის განმარტებით, ბრალდებულის მხრიდან მიმალვის, ახალი დანაშაულის ჩადენისა და მოწმეებზე ზემოქმედების საფრთხეები არსებობდა, რის გამოც, მის მიმართ ყველაზე მკაცრი აღკვეთის ღონისძიების პატიმრობის საფუძვლები არსებობდა.
დაცვის მხარე ამ შუამდგომლობას არ დაეთანხმა. ადვოკატ ლევან მარსაგიშვილის განმარტებით, გიორგობიანის მიმართ აღკვეთის ღონისძიების სახით 5000 ლარიანი გირაო უნდა გამოყენებულიყო.
შეგახსენებთ, 2 ნოემბერს, გვიან ღამით, სუპერმარკეტ “სპარში” ორ თანამშრომელს ფიზიკურად გაუსწორდნენ. სამართალდამცავებმა ჯგუფური ძალადობის ორგანიზებისა და მასში მონაწილეობის ფაქტზე “ქართული ოცნების” მხარდამჭერი, მანჩო გიორგობიანი დააკავეს. შსს-ს ცნობით, მანანა გიორგობიანი დაუკავშირდა ჯაკო ჯანსუღ ჩარკვიანს, რომელიც ადგილზე თანმხლებ პირებთან ერთად მივიდა, რა დროსაც მათ, სუპერმარკეტის ორი თანამშრომელი ძალის გამოყენებით გაიყვანეს გარე ტერიტორიაზე და ჯგუფურად ფიზიკურად გაუსწორდნენ. მანჩო გიორგობიანის ორგანიზებით მომხდარი ძალადობის საქმეზე შსს-მ 5 ადამიანი დააკავა.