შალვა პაპუაშვილი რუსთაველის გამზირზე მიმდინარე დაკავებების სერიას გამოეხმაურა, მათ შორის, კომენტარი გააკეთა 71 წლის დევნილი ქალის, აზა ჩილაჩავას დაპატიმრებაზე. როგორც პაპუაშვილი ამბობს, ამ ფაქტზე მორალური და პოლიტიკური პასუხისმგებლობა მთლიანად ფინეთის საგარეო საქმეთა მინისტრზეა.
“საქართველოს ხელისუფლება მოქმედებს სამართლიანად და ჰუმანურად. ჯერ ერთი – ხელისუფლება ვერ დაუშვებს, რომ 50 ადამიანმა საკუთარი ნება მოახვიოს მილიონ-ნახევრიან ქალაქს. ხედავთ უკმაყოფილებას, რომელიც არის საზოგადოებაში ამ უშინაარსო ქმედების მიმართ.
ხელისუფლება მოქმედებს სამართლიანად და ჰუმანურად. რაც შეეხება პასუხისმგებლობას, პირველი რეაგირება, რაც უნდა ჰქონდეს ნებისმიერ ადამიანს, უნდა მისწეროთ ფინეთის საგარეო საქმეთა მინისტრს, რომელიც მოტყუებით, თითქოს აქ რაღაც შეხვედრები უნდოდა, ჩამოვიდა, მერე გავიდა და გადაკეტა რუსთაველის გამზირი, რუსთაველის გადაკეტვაში მონაწილეობა მიიღო, ექსტრემისტებს ესაუბრა. მივიდა იქ და მეყანწიშვილია მგონი ის ქალბატონი, რომლის მიმართ მიმდინარეობს სისხლის სამართლის საქმე. ამ ადამიანთან მივიდა ფინეთის საგარეო საქმეთა მინისტრი. ამით მოიწონა რუსთაველის გადაკეტვა, მოიწონა რადიკალები და შეაგულიანა, რომ ხვალაც, ზეგაც, მაზეგაც გადაკეტეთ რუსთაველის გამზირიო.
ზუსტად მისი დამსახურებაა, რომ 71 წლის ადამიანმა, ამ ტალღას მიყოლილმა, ამით შეგულიანებულმა, სავარაუდოდ, მიიღო მონაწილეობა გზის გადაკეტვაში, რაზეც შესაბამისი სამართლებრივი პასუხისმგებლობაა. ამაზე მორალური და პოლიტიკური პასუხისმგებლობა არის ფინეთის საგარეო საქმეთა მინისტრზე.
ქალბატონ აზასთან დაკავშირებით პასუხი მოსთხოვეთ ევროკავშირის ელჩს, რაც შეეხება სახელმწიფოს, სახელმწიფო მოქმედებს სამართლიანად და ჰუმანურად“, – განაცხადა შალვა პაპუაშვილმა.
შეგახსენებთ, დევნილი ქალი გუშინ თავისუფლების მოედნის მიმდებარე ტერიტორიაზე დააკავეს, იზოლატორში გადაყვანის შემდეგ, 71 წლის აზა ჩილაჩავამ მშრალი შიმშილობა დაიწყო.