დაკავებული ინფრასტრუქტურის მინისტრის ყოფილი მოადგილე, კობა გაბუნია სუს-ის ექს შეფის, გრიგოლ ლილუაშვილის გარემოცვის წევრია – ამის შესახებ ინფრომაციას სოციალურ ქსელში კოალიცია “ცვლილებისთვის” წევრი, დავით მჟავანაძე ავრცელებს.
როგორც მჟავანაძე წერს, 2017 წელს, როდესაც გრიგოლ ლილუაშვილი სუს-ის უფროსის მოადგილე გახდა, კობა გაბუნია დასავლეთ საქართველოს უშიშროების უფროსი იყო, 2018 წელს კი ის ირაკლი ქარსელაძის მოადგილედ იქნა მივლენილი საავტომობილო გზების დეპარტამენტში, უკვე 2019 წლიდან კი ქარსელაძე ინფრასტრუქტურის მინისტრი როცა გახდა, კობა გაბუნია კვლავ მოადგილედ გადაიყვანა.
“დაკავებული კობა გაბუნია არის წარმოშობით ვანიდან, სუს-ის ყოფილო უფროსის გრიგოლ ლილუაშვილისა და მისი მოადგილის გიგა ნიკოლეიშვილის მსგავსად.
ის იყო ლილუაშვილისა და ნიკოლეიშვილის ნდობით აღჭურვილი პირი და უახლოესი გარემოცვის წევრი.
მას შემდეგ რაც 2017 წელს გრიგოლ ლილუაშვილი სუს-ის უფროსის მოადგილე გახდა, კობა გაბუნია დასავლეთ საქართველოს უშიშროების უფროსი იყო.
2018 წელს ის ირაკლი ქარსელაძის მოადგილედ იქნა მივლენილი საავტომობილო გზების დეპარტამენტში, ხოლო 2019 წლიდან ქარსელაძე ინფრასტრუქტურის მინისტრი გახდა, სადაც მოადგილედ კვლავ კობა გაბუნია გადაჰყავს.
ის იყო “ვანელების კლანის” და ირაკლი ქარსელაძის უახლოესი გარემოცვის წევრი და ქ.ოცნების აქტიური წევრი.
2016 წლიდან იწყება ლილუაშვილისა და მისი გარემოცვის (მეტწილად წარმოშობით ვანელების) მოძლიერება ივანიშვილის კარზე, რისი ნაწილიც იყო კობა გაბუნიაც.
2021 წელს ის ქუთაისში (სადაც ფაქტობრივად ცხოვრობდა), სხვადასხვა საარჩევნო უბნებზე ამომრჩევლის მოსყიდვას ახორცილებდა ქ.ოცნების სასარგებლოდ.
მისი დაკავება კიდევ ერთი დასტურია ქ.ოცნებაში არსებული მასობრივი კორუფციის, რესურსების მიტაცებისა და ღრმა შიდა კრიზისის”, – წერს მჟავანაძე.