სავარაუდოდ, ლუკოილს საქართველოში მუშაობის მხოლოდ ათობით დღე დარჩა, ისიც იმ შემთხვევაში, თუ ამერიკის მიერ მიცემულ ვადას გამოიყენებს. რუსული ენერგოგინტზე დაწესებული სანქციები ლუკოილ ჯორჯიასაც ეხება, რადგან სანქციები ვრცელდება კომპანიის ყველა შვილობილზე, სადაც ის 50 პროცენტზე მეტს ფლობს. ახლა ამ კომპანიებს 1 თვე აქვთ, რომ გადარიცხვები დაასრულონ.
ლუკოილ ჯორჯია ავსტრიაში რეგისტრირებულ კომპანოას ეკუთვნის, თუმცა ეს ავსტრიული კომპანია უკვე რუსული ლუკოილის მიერ კონტროლდება, ანუ სანქციებს ვერ ასცდება.
ლუკოილ ჯორჯიას დირექტორიც რუსეთის მოქალაქეა, სტავროპოლში დაბადებული რომან პეტრაშოვი. კომპანიაში ახლა გზებს ეძებენ, როგორ გადარჩნენ. ამერიკული სანქციების შემდეგ ლუკოილს წესით ბანკები აღარ უნდა მოემსახურონ, მომხმარებლები ვეღარ უნდა იხდიდნენ ბარათით და ანგარიშებიც გაიყინოს. თუ ასე არ მოხდება, მაშინ მთლიანად საბანკო სექტორი და ქვეყანა დადგება უკვე მეორადი სანქციების რისკის ქვეშ.
ფაქტია, დღეს ლუკოილის ბენზინგასამართ სადგურებზე არავინ გაჩერებულა – მოხმარებლები საწვავს დაბრკოლების გარეშე ასხამენ და თანხასაც იხდიან. პირველების გადამღები ჯგუფი აკვირდებოდა, რა ხდება ახლა ლუკოილ ჯორჯიაში. კომპანიაში ამტკიცებენ, რომ შეფერხება არ აქვთ.