საზოგადოებრივი ტრანსპორტით ერთჯერადად მგზავრობა 1 ლარი ხდება. თბილისის მერიას ტრანსპორტში განახლებული გადახდის სისტემა შემოაქვს – მოქალაქეებს 7 სახის აბონემენტის არჩევა შეეძლებათ. სისტემა 1-ლი თებერვლიდან ამოქმედდება.
აღნიშნულ გადაწყვეტილებას პოლიტოლოგი ლევან ლორთქიფანიძე სოციალურ ქსელში ეხმაურება:
“სააბონემენტო სისტემის შემოღება მისასალმებელია, მაგრამ ერთჯერადი მგზავრობის 1 ლარამდე გაზრდის გადაწყვეტილება არის დანაშაული.
საერთოდ საზოგადოებრივი ტრანსპორტის ფასი ხელოვნურად უნდა შემცირდეს 20-30 თეთრამდე, რათა ადამიანებს მიეცეთ სტიმული, რომ ზოგიერთ შემთხვევაში მაინც დატოვონ პირადი ავტომობილი სახლში.
ფასი ხელოვნურად უნდა შემცირდეს 20-30 თეთრამდე, რათა ადამიანებმა ზოგიერთ შემთხვევაში მაინც აღარ გააჩერონ ტაქსი.
ფასი ხელოვნურად უნდა შემცირდეს 20-30 თეთრამდე, რათა განსაკუთრებული სტატუსის არმქონე ღარიბებს გადაადგილება კიდევ უფრო მეტად გაუმარტივდეთ.
გულის მაგივრად აქვს ქვა იმ ადამიანს, ვინც ეს გადაწყვეტილება მიიღო.
გულის მაგივრად აქვს ქვა იმ ადამიანს, ვინც ხალხის ყოფის გათვალისწინების გარეშე, ხალხის გამწარების ხარჯზე გადაწყვიტა აბონემენტების ყიდვის წახალისება”, – წერს ლორთქიფანიძე “ფეისბუქის” პირად გვერდზე.
შეგახსენებთ, თბილისში საზოგადოებრივი ტრანსპორტით ერთჯერადად მგზავრობა ერთი ლარი ეღირება. აქამდე საზოგადოებრივი ტრანსპორტით მგზავრობის საფასური 50 თეთრი იყო.
როგორც კახა კალაძემ დედაქალაქის მთავრობის გუშინდელ სხდომაზე აღნიშნა, პირველ თებერვლამდე მეტროს, ავტობუსების, მიკროავტობუსის მომხმარებლებს ექნებათ შესაძლებლობა, შეიძინონ აბონემენტები.
მისი თქმით, 5 იანვრიდან დაიწყება ბარათების გაყიდვა მეტროს სალაროებში და „საქართველოს ბანკის“ ექსპრეს-ფილიალებში.
„რაც შეეხება აბონემენტებს, გვექნება ულიმიტო 90-წუთიანი ბარათი, რომელიც ეღირება ერთი ლარი. ადამიანებს, რომლებიც ხშირად არ სარგებლობენ საზოგადოებრივი ტრანსპორტით და არ სჭირდებათ შეღავათიან ფასში ხანგრძლივვადიანი ბარათის შეძენა, 90 წუთის განმავლობაში ერთ ლარად შეეძლებათ ნებისმიერი ტიპის ტრანსპორტით (მეტრო, ავტობუსი, მიკროავტობუსი) სარგებლობა და ამ ტრანსპორტებს შორის გადაჯდომისას დამატებით თანხას არ გადაიხდიან 90 წუთის განმავლობაში.
მეორე – შემოგვაქვს ულიმიტო, ერთდღიანი ბარათი, რომელიც ეღირება სამი ლარი. ამ ბარათის მფლობელს შეეძლება, მთელი დღის განმავლობაში, ნებისმიერი ტიპის საზოგადოებრივი ტრანსპორტით იმგზავრონ მხოლოდ სამ ლარად.
ასევე შემოგვაქვს ულიმიტო ერთკვირიანი ბარათი, რომელიც ეღირება 20 ლარი. ამ ბარათის მფლობელს შეეძლება მთელი კვირის განმავლობაში ყველა ტიპის საზოგადოებრივი ტრანსპორტით იმგზავროს. ეს ბარათი გათვლილია ტურისტებზე, რადგან საზოგადოებრივი ტრანსპორტის აქტიურ მომხმარებლებზე სხვა ტიპის ბარათები უფრო საინტერესოა.
ულიმიტო ერთთვიანი ბარათი ეღირება 40 ლარი. ამ ბარათის მფლობელები შეძლებენ მთელი თვის განმავლობაში ნებისმიერი ტიპის საზოგადოებრივი ტრანსპორტით იმგზავრონ მხოლოდ 40 ლარად. ასევე, გვაქვს ულიმიტო სამთვიანი ბარათი, რომელიც 100 ლარი ეღირება. ეს ბარათი კიდევ უფრო მაღალ ეკონომიას უზრუნველყოფს ტრანსპორტის აქტიური მომხმარებლებისთვის. გარდა ამისა, გვაქვს ულიმიტო 6-თვიანი ბარათი, რომელიც 150 ლარი ეღირება. გვაქვს ასევე ერთწლიანი ბარათები აბონემენტი, რომელიც 250 ლარი ეღირება. ერთწლიანი ბარათის მფლობელს თვეში მხოლოდ 20 ლარად შეეძლება ნებისმიერი ტრანსპორტით ულიმიტოდ სარგებლობა.
გვაქვს ასევე შეღავათიანი პროგრამები. უფასოდ საზოგადოებრივი ტრანსპორტით იმგზავრებენ თბილისში რეგისტრირებული უსინათლო პირები, მათი თანმხლები და გამცილებელი პირები, ასევე მოსწავლეები, უბნის ინსპექტორები, თბილისის პოლიციის დეპარტამენტის მთავარი სამმართველოს მოსამსახურეები. თბილისის მუნიციპალური ბაგა-ბაღების თანამშრომლები, თბილისში რეგისტრირებული ვეტერანები და სხვა. რაც შეეხება მგზავრობის შეღავათიან ტარიფებს – 20 თეთრის გადახდის უფლებით ისარგებლებენ თბილისის უმაღლესი საგანმანათლებლო დაწესებულების სტუდენტები, საჯარო ზოგადსაგანმანათლებლო დაწესებულების თანამშრომლები, პენსიონერები, თბილისის საკუთრებაში არსებული უბნის ექიმები, პედიატრები, მანდატურები და სხვა. ასევე, გვაქვს შეღავათიანი მგზავრობა – 10-თეთრიანი მგზავრობის უფლებით ისარგებლებენ სოციალურად დაუცველთა ბაზაში რეგისტრირებული 70 ათასი და დაბალი ქულის მქონე თბილისის ტერიტორიაზე მცხოვრები მოქალაქეები“, – განაცხადა კალაძემ.
https://mix.metronome.ge/24662-2/