საქართველოს მეხუთე პრეზიდენტმა, სალომე ზურაბიშვილმა პრაღაში “Forum 2000”-ის ფარგლებში გამართულ პანელურ დისკუსიაზე 4 ოქტომბერს განვითარებულ მოვლენებთან დაკავშირებით ისაუბრა და განაცხადა, რომ ორბელიანების სასახლის ღობე “წინასწარ იყო მომზადებული თავადასხმისთვის, სავარაუდოდ, ადგილობრივი ძალოვანების მიერ”.
მისი თქმით, 4 ოქტომბრის “სცენარს” მხოლოდ ერთი მიზანი ჰქონდა – “მოეხდინათ მშვიდობიანი წინააღმდეგობის მოძრაობის დისკრედიტაცია”.
სალომე ზურაბიშვილმა ასევე აღნიშნა, რომ საპროტესტო მოძრაობა რეჟიმმა ვერ გააჩერა და მშვიდობიანი პროტესტი კვლავ გრძელდება.
“რუსული სტილის სხვადასხვა სტრატეგია სრულად გამოიყენება ჩვენ ქვეყანაში. რამდენიმე დღის წინ ვნახეთ ორბელიანების სასახლეზე თავდასხმის მოდელირებული ფორმა, რაც აბსურდული იყო, ღობეები წინასწარ იყო მომზადებული ამ თავდასხმისთვის, სავარაუდოდ, ადგილობრივი ძალოვანების მიერ. გარკვეული სცენარი მომზადდა, სავარაუდოდ, ოპოზიციის ზოგიერთი წევრის გამოყენებით, რომლებიც არ იყვნენ კარგად მომზადებულები, ან ვერ აცნობიერებდნენ რა ხდებოდა და საბოლოოდ, ამ სცენარს ჰქონდა მხოლოდ ერთი მიზანი – მოეხდინათ დისკრედიტაცია წინააღმდეგობის მოძრაობის, მშვიდობიანი წინააღმდეგობის მოძრაობის, რომელიც ქუჩაში დგას უკვე 319 დღეა და რომელიც არ გაჩერებულა მას შემდეგ, რაც პრემიერმინისტრმა გასულ ნოემბერში შეაჩერა ევროკავშირში გაწევრიანების პროცესი. ეს არის სწორედ ის საპროტესტო მოძრაობა, რომელიც ვერ გააჩერა რეჟიმმა. მათ ვერ გააჩერეს მზია ამაღლობელი და სხვები, რომლებიც ასევე, დამატებით დააპატიმრეს და 100 პოლიტიკურ პატიმარს ავცდით უკვე ბოლო დღეებში. სწორედ ეს იყო მიზანი, რომ დისკრედიტაცია მოეხდინათ ამ მოძრაობის, თუმცა ამანაც არ იმუშავა. მშვიდობიანი პროტესტი გრძელდება და ესაა მოძრაობა, რომელიც იცავს კონსტიტუციას და არა თავს ესხმის მას. ჩვენ ვერ ვირჩევთ მეზობლებს, მაგრამ ჩვენ ვირჩევთ პარტნიორებს, ახლა ყოყმანის დრო არაა, ახლა ერთიანობისა და ქმედებების დროა,” – განაცხადა სალომე ზურაბიშვილმა.