გმირის ჯილდოს გადაცემა დამნაშავისთვის, რომელიც თავს დაესხა პოლიციელს და ამით სილა გააწნა სახელმწიფოს, საზოგადოების დაცინვაა, – ამის შესახებ “ქართული ოცნების” კომუნიკაციების ხელმძღვანელმა, გიორგი გრძელიშვილმა, მზია ამაღლობელთან დაკავშირებით, ბრიფინგზე განაცხადა.
გრძელიშვილის თქმით, ამაღლობელისთვის გმირის ჯილდოს გადაცემა მკაფიოდ აჩვენებს, თუ რა მძიმე მდგომარეობაშია საერთაშორისო მედია და საერთაშორისო პრესა.
“მზია ამაღლობელისთვის გმირის ჯილდოს გადაცემა მკაფიოდ აჩვენებს, თუ რა მძიმე მდგომარეობაშია საერთაშორისო მედია, საერთაშორისო პრესა, რომელიც ზუსტად ისე, როგორც ბრიუსელის პოლიტიკური ისტებლიშმენტი, ერთი ცენტრიდან იმართება, ერთი ხელით ტოტალურად კონტროლდება და ნებისმიერი მსგავსი გადაწყვეტილება კონკრეტულ მიზანს ემსახურება. ამ შემთხვევაში, მსჯავრდებული ამაღლობელი მიზანმიმართული ძალადობისთვის, სახელმწიფოსა და მის ინსტიტუციებზე თავდასხმისთვის გამოიყენეს, ხოლო, შედეგად ვხედავთ, რომ „დაუფასეს“ დავალების პირნათლად შესრულება და საერთაშორისო ასპარეზზე არც მეტი, არც ნაკლები – გმირად გამოგვიცხადეს. სწორედ ეს არის „დიპ სტეიტის“ ხელწერა – პოლიტიკაშიც და მედიაშიც მათთვის არსებობს მხოლოდ ერთი – გაუკუღმართებული სტანდარტი, როდესაც ხელისუფლების დამხობის ორგანიზატორებს მსხვერპლად აცხადებენ – კანონის აღმსრულებელ ხელისუფლებას კი მოძალადედ. როდესაც მოძალადე ჟურნალისტს გმირის ჯილდოს აძლევენ, ხოლო საკუთარი საქმის კეთილსინდისიერად შემსრულებელ ჟურნალისტებს „რუსული პროპაგანდის“ გამხმოვანებლად მოიხსენიებენ ისე, რომ 1 ფაქტის წარმოდგენაც კი არ შეუძლიათ.” – განაცხადა გრძელიშვილმა ბრიფინგზე.