დროზე უნდა დასხდეს ოპოზიცია ერთ მაგიდასთან და დაიწყოს დიალოგი – ამის შესახებ პოლიტიკოსი რომან გოცირიძე სოციალურ ქსელში წერს.
“არაა სწორი, რომ ისეთი არგუმენტით ვცდილობთ კალაძის გაშავებას, როგორიცაა არჩევნებში მისი მიღებული შედეგები. თურმე მას თბილისში რეგისტრირებული ამომრჩევლების მხოლოდ
20-მა პროცენტმა მისცა ხმა. დროა ქოცების ნამდვილი დანაშაულების უფრო კვალიფიციურად მხილებას მივყოთ ხელი, ვიდრე ამას აქამდე ვაკეთებდით. საარჩევნო კამპანიის პერიოდში კალაძის მიერ გაფორმებული ხელშეკრულებით ქვეყანამ 94 მილიონი დოლარი დაკარგა რუსული “ინტერრაოს” სასარგებლოდ და ამაზე არც მედიას და არც ოპოზიციას ერთი კითხვაც კი არ დაუსვამს მისთვის.
ამომრჩევლის ნებაა, როგორც მისვლა ისე არმისვლა. ამომრჩევლის აქტიურობას არა აქვს კავშირი არჩეულის ლეგიტიმურობასთან, თუნდაც მორალურ ლეგიტიმაციაზე იყოს საუბარი. ამერიკის პრეზიდენტებიც მთლიანი ამომრჩევლის დაახლოებით 30 პროცენტს იღებენ აირჩევნებში. ამერიკაში დაახლოებით 240 მილიონი პოტენციური ამომრჩეველია, ტრამპმა კი 74 მილიონი ხმა მიიღო, ანუ ხმის უფლების მქონე ამომრჩეველთა 31 პროცენტმა დაუჭირა მხარი.
რომელ არითმეტიკაზეა საუბარი კალაძესთან დაკავშირებით, როცა არჩევნები ფაქტობრივად არ ჩატარებულა.
ოპოზიცია უგუნურად მოიქცა ამ არჩევნების დროს. ან ყველას უნდა მიეღო მონაწილეობა ან არავის. ერთმანეთზე გადაბრალება და თითიდან გამოწოვილი არგუმენტები არაფერს შველის. ეს არგუმენტები კიდევ უფრო სასაცილოდ გამოიყურებიან არშემდგარი “რევოლუციის” ფონზე.
დროზე უნდა დასხდეს ოპოზიცია ერთ მაგიდასთან და დაიწყოს დიალოგი. თუ ვინმეს ჰგონია, რომ სხვებზე უკეთ გამოიყურება ამ ოპოზიციურ შიდა ომში, ძალიან ცდება. ახლა მთავარი ამოცანა რეპრესიების შეკავებაა, მათ შორის საერთაშორისო ძალისხმევით. უნდა გავაგებინოთ ჩვენს პარტნიორებს, რომ მორჩა სანახევრო სანქციების დროს. უფრო მკვეთრი ნაბიჯებია გადასადგმელი. ოპოზიციამ კი როგორმე უნდა გამონახოს საერთო ენა”