“ახლა მე ვინმემ უნდა მითხრას, რომ შეურიგდიო და აპატიეო?”, – ამის შესახებ კონტროლის პალატის ყოფილი თავმჯდომარის, სულხან მოლაშვილის მამამ თამაზ მოლაშვილმა აჭარის საზოგადოებრივი მაუწყებლის ეთერში, საქართველოს ექს-პრეზიდენტ, მიხეილ სააკაშვილთან დაკავშირებით საუბრისას განაცხადა.
“ახლა მე ვინმემ უნდა მითხრას, რომ შეურიგდიო და აპატიეო? მეტირება უკვე… დედის მაგისამ, მე არ ვაპატიებ, ჩემი შვილი აღარ მყავს ცოცხალი, შვილი, შვილი, ხალხო.
ვინც ტაშს უკრავს და ეფერება… ხანდახან ვიტყვი ხოლმე, იმას რომ შვილი მოუკლან, ის ტაშს დაუკრავს და მიეფერება სააკაშვილს? მე შვილი აღარ მყავს, შვილი, შვილი მომიკლა სააკაშვილმა”, – ამბობს თამაზ მოლაშვილი ვახო ხუზმიაშილთან საუბრისას.
ცნობისთვის, სულხან მოლაშვილი 2004 წლის აპრილში, სამსახურებრივი უფლებამოსილების ბოროტად გამოყენებისა და კორუფციის ბრალდებით დააკავეს, ხოლო 2005 წლის სექტემბერში სასამართლომ მას ცხრა წლით თავისუფლების აღკვეთა მიუსაჯა. 2004 წელს მოლაშვილმა მისი წამების და ღირსების შემლახველი მოპყრობის ფაქტზე ევროპის ადამიანის უფლებათა სასამართლოს მიმართა, რომელმაც 2014 წელს დაადასტურა, რომ მოლაშვილი მართლაც იყო წამებისა და არაადამიანური მოპყრობის მსხვერპლი.
სტრასბურგის სასამართლომ საქართველოს სახელმწიფოს დააკისრა საქმის გამოძიება და მოლაშვილისთვის, მორალური კომპენსაციის სახით, 20 ათასი ევროს გადახდა.
სულხან მოლაშვილი 2016 წელს, 47 წლის ასაკში გარდაიცვალა. მას ღვიძლის დაავადების გამო საფრანგეთის ერთ-ერთ კლინიკაში მკურნალობდნენ.