“ვფიქრობ, წელს ბევრი საინტერესო და მნიშვნელოვანი გადაწყვეტილება იქნა მიღებული თქვენ მიერ” – ასე მიმართა საქართველოს ბიზნეს ასოციაციის პრეზიდენტმა სოსო ფხაკაძემ საქართველოს პრემიერ-მინისტრ ირაკლი ღარიბაშვილს ფარმაცევტული ბიზნესის მონაწილეობით მთავრობის ადმინისტრაციაში გამართულ შეხვედრაზე.
როგორც ფხაკაძემ აღნიშნა, პრემიერის მიერ მიღებულმა გადაწყვეტილებებმა ქვეყანას ბევრი სიკეთე მოუტანა.
„პრემიერთან საუბარი იყო სხვადასხვა საკითხზე, ერთ-ერთი იყო ფარმაცევტული ბიზნესი; მაშინ ითქვა, რომ უნდა შემდგარიყო შეხვედრა. პრემიერმა იმ წუთში დაადასტურა, რომ უნდა შევიკრიბოთ და პროფესიულად და აკადემიურად განვიხილოთ საკითხი.
ვფიქრობ, ამ ოთახში, ამ წელიწადში ბევრი საინტერესო და მნიშვნელოვანი გადაწყვეტილება იქნა თქვენ მიერ მიღებული, ჩვენი წარდგინებით, თქვენი დახმარებით და ამან ძალიან ბევრი სიკეთე მოუტანა ამ ქვეყანას“, – მიმართა ფხაკაძემ მთავრობის მეთაურს.
აღნიშნულს ჟურნალისტი ეკა კვესიტაძე სოციალურ ქსელში შემდგენაირად ეხმაურება:
“ამ კაცის დანახვაზე წესიერ ადამიანს ეგრევე გულისრევა უნდა დაეწყოს”, – წერს კვესიტაძე სოციალურ ქსელში.
ცნობისთვის, ფარმაცევტული ბიზნესის წარმომადგენლებთან მთავრობის ადმინისტრაციაში გამართულ შეხვედრაზე იმსჯელეს კონკურენციის სააგენტოს მიერ მომზადებულ ფარმაცევტული ბაზრის შუალედურ ანგარიშზე და მასში წარმოდგენილ რეკომენდაციებზე. განიხილეს, თუ რა კონკრეტული ნაბიჯები შეიძლება გადაიდგას ფარმაცევტულ ბაზარზე არსებული ვითარების დარეგულირების მიზნით. აღინიშნა, რომ მნიშვნელოვანია მედიკამენტების გაზრდილ ფასებზე დროული რეაგირება და ქმედითი ნაბიჯების გადადგმა.
ირაკლი ღარიბაშვილმა ხაზი გაუსვა, რომ მნიშვნელოვანია, გათვალისწინებული და მაქსიმალურად დაცული იყოს მოსახლეობის ინტერესები, ხოლო მეორე მხრივ, გათვალისწინებული იყოს ბიზნესის მოსაზრებებიც.
„ჩვენ დავასრულეთ შუალედური ანგარიში, რომელიც ხელმისაწვდომია ყველასთვის. მინდა, თქვენც გაგიზიაროთ ეს ხედვა, თქვენგან მოვისმინო რეკომენდაციები, თქვენი აზრი და ვიმსჯელოთ ამ თემაზე. რაც მთავარია, მინდა, რომ ყველაფერი სწორად გავაკეთოთ, ისე, რომ ჩვენი მოსახლეობის ინტერესები იყოს გათვალისწინებული, მაქსიმალურად დაცული, მაგრამ მეორე მხრივ, ჩვენ გვინდა, რომ ბიზნესის ინტერესებიც გავითვალისწინოთ. ჩვენ თუ ამ ბალანსს ვიპოვით, ეს იქნება იდეალური გამოსავალი ჩვენი ქვეყნისთვის, ჩვენი მოსახლეობისთვის”, – აღნიშნა პრემიერ-მინისტრმა.
მთავრობის ადმინისტრაციაში გამართულ შეხვედრას საქართველოს კონკურენციის ეროვნული სააგენტოს თავმჯდომარე ირაკლი ლექვინაძე და ფარმაცევტული ბაზრის მონიტორინგის ჯგუფის ხელმძღვანელი გიორგი ქედელიძე ესწრებოდნენ.