“მოკვდები და ქუთაისი გახდება სანიმუშო არაკორუმპირებული ქალაქი” – რას აცხადებს პაატა ზაქარეიშვილი

ქუთაისელებს გარანტიას ვაძლევ, მოკვდები და ქუთაისი გახდება სანიმუშო არაკორუმპირებული ქალაქი, სადაც ვერანაირი კლანურობა ვერ გაიმარჯვებს, – ამის შესახებ პარტია „გახარია საქართველოსთვის“ ქუთაისის მერობის კანდიდატმა, პაატა ზაქარეიშვილმა „პალიტრანიუსთან” განაცხადა.

როგორც პაატა ზაქარეიშვილი აცხადებს, ის უპარტიო კანდიდატია და პარტიულ პოლიტიკაში არ დაბრუნებულა.

„მე არ დავბრუნებულვარ პარტიულ პოლიტიკაში, ვარ უპარტიო. ჩემთვის დიდი პატივია, რომ ისე, რომ არ ვარ „გახარია საქართველოსთვის“ პარტიის წევრი, ამ პარტიამ შემომთავაზა, დავიკავო სერიოზული პოზიციები წინასაარჩევნოდ[…]

დასრულდა თუ არა საპარლამენტო არჩევნები, იმავე ღამეს ვთქვი, რომ ჩვენ ვნახეთ, როგორ გაყალბდა არჩევნები, ვნახეთ მინუსები და პლუსები როგორც ოპოზიციის, ისე „ქართული ოცნების“. ვთქვი, რომ სულ რაღაც ერთ წელიწადში ადგილობრივი არჩევნები იქნება. თუთიყუშივით ვიმეორებდი ერთი და იმავეს – „ტემპერატურა არ უნდა დავარდეს“. საჭიროა, გავითვალისწინოთ ჩვენი და მათი შეცდომები და უკვე ახალი გამოცდილებით შევიდეთ ადგილობრივ არჩევნებზე. ეს იმიტომ, რომ „ქართული ოცნება“ ვერ მოასწრებს ახალი სტანდარტების დადგენას გაყალბებაში.

აღვირახსნილი კამპანია იყო ჩემ წინააღმდეგ. ამ აღვირახსნილმა ბულინგმა მაიძულა, რომ დავთანხმებულიყავი წინადადებას და ჩავრთულიყავი საარჩევნო კამპანიაში.

ქუთაისელებს გარანტიას ვაძლევ, მოკვდები და ქუთაისი გახდება სანიმუშო არაკორუმპირებული ქალაქი, სადაც ვერანაირი კლანურობა ვერ გაიმარჯვებს, – განაცხადა ზაქარეიშვილმა.

შეგახსენებთ, პაატა ზაქარეიშვილმა 6 სექტემბერს, “ფორმულას” ეთერში დაადასტურა, რომ  „გახარია საქართველოსთვის“ ქუთაისის მერობის კანდიდატი იქნება.