“ამაშია ოპოზიციის სისუსტე-ვერ არჩევენ მთავარს მეორეხარისხოვნისაგან. ნაცვლად იმისა, რომ ხელზე დაეხვიათ საქსტატის საგანგაშო შედეგები, გაღმა შედავების პრინციპით იმოქმედეს ქოცებმა. ამ დემაგოგიაზე პასუხი არავის გაუცია” – ამის შესახებ პოლიტიკოსი რომან გოცირიძე სოციალურ ქსელში წერს.
“მასობრივი კამპანია წამოიწყო “ქართულმა ოცნებამ” მას შემდეგ, რაც გუშინ გამოქვეყნდა მოსახლეობის აღწერის საბოლოო შედეგი. ამტკიცებენ, რომ თურმე საქართველოს მოსახლეობაში უცხოელი მოქალაქეების წილი მნიშვნელოვნად არ გაზრდილა და ეს ოპოზიციის გამონაგონია. არა და ამ არასანდო აღწერის შედეგებითაც კი წინა აღწერასთან შედარებით მნიშვნელოვნად, 9-ჯერ არის გაზრდილი უცხოელების რაოდენობა. ამაშია ოპოზიციის სისუსტე-ვერ არჩევენ მთავარს მეორეხარისხოვნისაგან. ნაცვლად იმისა, რომ ხელზე დაეხვიათ საქსტატის საგანგაშო შედეგები, გაღმა შედავების პრინციპით იმოქმედეს ქოცებმა. ამ დემაგოგიაზე პასუხი არავის გაუცია.
ვნახოთ, სინამდვილეში რა ხდება.
2014 წლის აღწერის მიხედვით საქართველოს მოსახლეობის შემადგენლობაში მუდმივად მცხოვრები უცხოეთის მოქალაქეების რაოდენობა შეადგენდა 29 ათას კაცს, 2024 წლის აღწერის მიხედვით კი მათი რიცხვი არის 257 ათასი კაცი, ანუ გაიზარდა 9-ჯერ. ეს ბოლო მონაცემიც არ არის ზუსტი. უცხოელების რაოდენობა გაცილებით მეტია, არაა გამორიცხული, რომ ორჯერ მეტიც კი. აქ მცხოვრებ უცხოელებს რომ ჰკითხოთ, მიიღო თუ არა აღწერაში მონაწილეობა, ათიდან ცხრა გეტყვით, რომ არ მიუღია.
საქართველოს მოსახლეობა გაიზარდა მხოლოდ უცხოელების ხარჯზე, რადგან ამ პერიოდში მიგრაციისა და ცოცხლად დაბადებულებზე გარდაცვლილთა მეტობის გამო( რაზეც პანდემიამაც მოახდინა გავლენა) საქართველოს მოქალაქეთა რიცხოვნობა მკვეთრად შემცირდა.
საქსტატი ეწევა მანიპულაციას, რაც პოლიტიკური მიზეზებით შეიძლება აიხსნას-ხელოვნურად ზრდის საქართველოს მოქალაქეების რაოდენობას და ამცირებს ქვეყანაში მუდმივად მცხოვრები უცხოელი მოქალაქეების რიცხოვნობას. ამ უკანასკნელის დიდი ნაწილი აქ დამკვიდრებული რუსეთის მოქალაქეებია, რომლებმაც დიდძალი უძრავი ქონება შეიძინეს( მიწები, ბინები, კომერციული ფართები და ა. შ. )”