ვრცელდება პროევროპულ აქციაზე დაკავებული არჩილ მუსელიანცის წერილი ციხიდან, რომელიც მან განაჩენის გამოცხადებამდე დაწერა. წერილში იგი მის მოლოდინებზე საუბრობს და ხალხს ბოლომდე ბრძოლისაკენ მოუწოდებს.
“მინდა ყველას უდიდესი მადლობა გადაგიხადოთ ჩემი ცხოვრების რთულ ეტაპზე გვერდში დგომისთვის. ამ წერილს წინასწარ ვწერ იმიტომ, რიმ ვიცი მომისჯიან.
მაინც შეასრულებენ ამ დავალებას. ჩემს სამომავლო პატიმრობის განცდას გეტყვით, საერთოდ არ განვიცდი, რადგან საპირისპიროდ ქვეყანაა და მისი მიმავალი. 6 წელიც რომ მომისაჯონ, მე მზად ვარ მოვიხადო უსამართლო სასჯელი იმიტომ, რომ სამშობლოა ჩემთვის ღირსება.
ერთს გთხოვთ მხოლოდ – იბრძოლეთ! წარმოიდგინეთ, როგორ საქართველოში ვიცხოვრებდით თუკი გენერალი მაზნიაშვილი დანებდებოდა? და ილია ჭავჭავაძე? როგორი საქართველო იქნებოდა, რომ არა ზვიად გამსახურდიას და მერაბ კოსტავას ბრძოლა? როგორ საქართველოში ვიცხოვრებდით, რომ არა შინდისის ვმირების სულისკვეთება? და როგორი იქნებოდა საქართველო გიორგი ანწუხელიძის გარეშე? ისინი ლამაზი, ბედნიერი და დამოუკიდებელი საქართველოსთვის იბრძოდნენ. ჩვენც ამისთვის ვიბრძვით და ამას აუცილებლად მივაღწევთ – ჩვემ ამას შევძლებთ!
მიყვარხართ ყოველივე თქვენთაგანი. მეამაყებით ყოველივე თქვენთაგანი. გაუფრთხილდით ერთმანეთს, გიყვარდეთ ერთმანეთი, სამშობლო ხომ სიყვარულია. სამშობლო ყოველივე თქვენთაგანია.
შევხვდებით რუსთაველზე – იქ ვიზეიმებთ გამარჯვებას, სადაც ყველაფერი დაიწყო”, – ნათქვამია არჩილ მუსელიანცის წერილში.
შეგახსენებთ, რომ არჩილ მუსელიანცი 2024 წლის 30 ნოემბერს დააკავეს. ის დაკავებული იქნა ადმინისტრაციული მუხლით, თუმცა შემდეგში მუხლი გადაუკვალიფიცირდა და 187- ე მუხლის მეორე ნაწილით, რაც სხვისი ნივთის განზრახ დაზიანებასა და განადგურებას გულისხმობს. მას 4 წლით თავისუფლების აღკვეთა მიესაჯა.