ალასკიდან ვაშინგტონში – მსოფლიოს ყურადღების ცენტრში ხვალ ამერიკის შეერთებული შტატები და თეთრი სახლი იქნება, სადაც ვოლოდიმირ ზელენსკი დონალდ ტრამპს შეხვდება. შტატებისა და უკრაინის პრეზიდენტები ევროპის კონტინენტზე მიმდინარე სამ წლიანი ომის დასრულების საკითხზე იმსჯელებენ. ტრამპი ზელენსკის პუტინთან გამართული შეხვედრის დეტალებს და ხანგრძლივი მშვიდობის სანაცვლოდ რუსეთის მოთხოვნებს გააცნობს.
ალასკაზე გამართულ სამიტზე საუბრობს რუსეთის პრეზიდენტი, ევროპელი ლიდერები კი სამშვიდობო მოლაპარაკებების მოლოდინში არიან.
“შეხვედრა იყო დროული და საკმაოდ ნაყოფიერი. განვიხილეთ თანამშრომლობის თითქმის ყველა სფერო, პირველ რიგში კი, რა თქმა უნდა, ვიმსჯელეთ სამართლიანი საფუძვლებით უკრაინის კრიზისის გადაჭრის გზებზე, ჩვენ გვქონდა შესაძლებლობა გვესაუბრა კრიზისის საფუძვლებსა და მიზეზებზე.
დიდი ხანია, რაც ამ დონეზე ამ ტიპის პირდაპირი მოლაპარაკებები არ გვიწარმოებია. კიდევ ერთხელ ვიმეორებ, შესაძლებლობა მოგვეცა, მშვიდად და დეტალურად დაგვეფიქსირებინა ჩვენი პოზიცია. რა თქმა უნდა, პატივს ვცემთ ამერიკის ადმინისტრაციის პოზიციას, რომელიც საბრძოლო მოქმედებების ადრეული შეწყვეტის აუცილებლობას ხედავს. სწორედ ამის გაკეთება და ყველა საკითხის მშვიდობიანი გზით გადაწყვეტა გვსურს. საუბარი ძალიან გულწრფელი და ინფორმაციული იყო”, – აცხადებს ვლადიმერ პუტინი.