საქართველოს ეკონომიკის ყოფილი მინისტრი, ტელეკომპანია „იმედის“ ყოფილი დირექტორი გიორგი არველაძე საქართველოში მიმდინარე პროცესებს შემდეგი სახის პოსტს უძღვნის:
“ხალხს აშკარად ბრძოლა სწყურია. მოწყენილი პოლიტიკოსები კი დაღლილად ითავსებენ პოლიტიკური კომენტატორობის ფუნქციას, ყურებჩამოშვებულები იძლევიან ზოგად-ანალიტიკურ ინტერვიუებს და შიგადაშიგ უფრო დაღლილი სადღეგრძელოებით აზავებენ. არადა, როგორ ითხოვს მომენტი ლიდერის ომახიან მოწოდებას: “ყველანი სასწრაფოდ სასამართლოსთან!”, – წერს არველაძე “ფეისბუქის” პირად გვერდზე.
გიორგი არველაძის აღნიშნულ განცხადებას, “ტაბულას” დამფუძნებელი, ჟურნალისტი თამარ ჩერგოლეიშვილი ეხმაურება:
“პოლიტპატიმარი სააკაშვილის მოწოდებები რომ დაიხსნან – არ ყოფნის ხალხს!
არც უგულავას მოწოდებები ყოფნის!
არც ჭიაბერაშვილის მქუხარე ზანზარი!
არც მელიას შემართება!
არც ბარამიძის კბილთა ღრჭენა!
არც თაკო ჩარკვიანის ელვარე ჭექა!
არაა არცერთი საკმარისად ომახიანი!
ვიღაც კიდევ სხვა ლიდერია საჭირო იმისთვის, რომ ხალხი აგუგუნდეს.
2012 წლიდან გაქცეულია ეს კაცი – იქიდან წერს,” – წერს ჩერგოლეიშვილი სოციალურ ქსელში.