ზუგდიდში მომხდარი სასტიკი დანაშაულის შესახებ ახალი დეტალები ხდება ცნობილი.
42 წლის ნათია აფხაზავას მკვლელობისთვის, 34 წლის ნათია ხაჩატურიანი დააკავეს.
როგორც ადგილობრივები ჰყვებიან, მოკლული ქალი, მკვლელობაში ბრალდებულის მეუღლის ნათესავი იყო. ქალები ერთმანეთთან მეგობრობდნენ კიდეც.
„მოკლული ქალი, ნათია აფხაზავა გერმანიაში ცხოვრობდა, ქმარიც იქაური ჰყავს. უნიჭიერესი გოგო იყო. ბევრ ადამიანს ეხმარებოდა.
ქალები ერთმანეთთან მეგობრობდნენ კიდეც. აფხაზავამ ხაჩატურიანს საქართველოში ბინის შესაძენად და რემონტის გასაკეთებლად საჭირო თანხა გამოუგზავნა. ამბობენ, რომ ბინა იყიდეს, თუმცა, რემონტისთვის საჭირო ფული დახარჯეს. ესეც ყოფილა კონფლიქტის ერთ-ერთი მიზეზი. გარდა ამისა, ხაჩატურიანი აფხაზავაზე ეჭვიანობდა“, – ამბობენ ადგილობრივები.
შსს-ს ოფიციალური განცხადების თანახმად, მკვლელობამდე, ქალებს შორის დაპირისპირება მოხდა, რის შემდეგაც, ხაჩატურიანმა აფხაზავას დანით მრავლობითი ჭრილობა მიაყენა. მკვლელობაში ბრალდებული ქალი სამართალდამცველებმა ცხელ კვალზე დააკავეს.