ფინეთის ეროვნული პროკურატურის განცხადებით, ორშაბათს, 11 აგვისტოს, ბრალი წაუყენეს ნავთობმზიდი ტანკერის „Eagle S“-ის ქართველ კაპიტანს, ასევე მის პირველ და მეორე თანაშემწეებს, დეკემბერში ფინეთის ყურეში წყალქვეშა კაბელების დაზიანების გამო. ინფორმაციას ამის შესახებ Reuters-ი ავრცელებს.
პროკურატურის ცნობით, გემის კაპიტანი, საქართველოს მოქალაქე დავით ვადაჭკორია და ინდოეთის მოქალაქეები ეჭვმიტანილნი არიან გემის ღუზის ზღვის ფსკერზე დაახლოებით 90 კილომეტრის მანძილზე გათრევით დამამძიმებელ გარემოებებში ჩადენილი სისხლის სამართლის დანაშაულსა და საკომუნიკაციო ინფრასტრუქტურაში ჩარევაში.
განცხადების მიხედვით, დაცვის მხარის წარმომადგენლები, რომლებსაც ფინეთის დატოვების უფლება არ აქვთ, უარყოფენ სამართალდარღვევის ჩადენას და მიიჩნევენ, რომ ფინეთს არ გააჩნია საქმეში იურისდიქცია, ვინაიდან ინციდენტი ფინეთის ტერიტორიულ წყლებს მიღმა მოხდა.
ფინეთის ხელისუფლების თქმით, კუკის კუნძულებზე დარეგისტრირებულმა Eagle S-მა Estlink 2-ის წყალქვეშა ელექტრო კაბელი და კიდევ ოთხი ინტერნეტის კაბელი დააზიანა, რომელიც ფინეთსა და ესტონეთს ერთმანეთთან აკავშირებდა.
“კაბელების მფლობელებს, სულ მცირე, 60 მილიონი ევროს ($70 მილიონი) მყისიერი ზარალი მიადგათ, მხოლოდ შეკეთების ხარჯების სახით,” განაცხადა პროკურატურამ.