დღეს, თბილისის საქალაქო სასამართლოში, პროევროპულ აქციებზე დაკავებული ვეფხია კასრაძის სასამართლო პროცესია, სადაც იგი სიტყვით გამოვიდა და 2008 წლის ომთან დაკავშირებით ისაუბრა. მისი თქმით, ის განცხადება, რომელიც დღეს კეთდება, სამარცხვინოა, რადგან საქართველოს ომი არ დაუწყია.
“ნებისმიერი ძალადობის წინააღმდეგი ვიყავი ყოველთვის, ნებისმიერი ძალადობრივი მეთოდით სახელმწიფოს გადატრიალების, დაწყებული ზვიად გამსახურდიას მთავრობის პერიოდიდან…
მე ბრძოლას გავაგრძელებ კონსტიტუციის ფარგლებში, სანამ ეს ხელისუფლება არ შეიცვლება, მე გავაგრძელებ ბრძოლას, ვერაფერი გამაჩერებს. მე ქედს არ მოვიხრი მტრების წინაშე…
გუშინ მოვისმინე პრემიერის სამარცხვინო განცხადება, როგორც არ უნდა გძულდეს წინა პრეზიდენტი, არ შეიძლება შენი ქვეყანა დაადანაშაულო… მე სამაჩაბლოდან ვარ და ძალიან კარგად ვიცი, როგორ დაიწყო და როგორ განვითარდა, ყველაფერი, საქართველოს ხელისუფლებას ომი არ წამოუწყია, იძულებული გახდა, რომ ჩაეტარებინა სპეცოპერაცია სიტუაციის განსამუხტად…
არც 7 და 8 აგვისტოს დაწყებულა, ერთი თვით ადრე დაიწყო, როცა ოსებმა გაიყვანეს მშვიდობიანი მოსახლეობა და პირველი ივლისიდან დაიწყო მასირებული შეტევები ქართულ ჯარზე და საქართველოს სოფლებზე. გაუსაძლისი იყო უკვე იქ მდგომარეობა, მოსახლეობა ვითხოვდით მიეღოთ ზომები და იძულებული გახდა მაშინდელი პრეზიდენტი და 7 აგვისტოს ღამე იყო, როცა მიმართა მშვიდობისკენ და ცეცხლის შეწყვეტისკენ და არ შეწყვიტეს. უკვე შეყვანილი ჰყავდათ ერთი თვით ადრე დაქირავებული ჯარები, დაიწყეს და დაამთავრეს კიდეც ძალიან ცუდად 20% გვაქვს დაკარგული.
აღარ ვუსურვებდი ჩვენს სამშობლოს ასეთ მოღალატე და სამარცხვინო ხელისუფლებას“ – განაცხადა ვეფხია კასრაძემ.