4 აგვისტოს, ბათუმის საქალაქო სასამართლოში მზია ამაღლობელის სასამართლო პროცესი გაიმართა, სადაც “ბათუმელებისა” და “ნეტგაზეთის” დამფუძნებელი სიტყვით გამოვიდა. მოსამართლე ნინო სახელაშვილმა მზია ამაღლობელის საქმეზე გადაწყვეტილების გამოცხადება კიდევ ერთხელ გადადო. მომდევნო სხდომა 6 აგვისტოს, 14:00 საათზე ჩაინიშნა.
მზია ამაღლობელის საქმესთან დაკავშირებით, არქიმანდრიტი დოროთე ყურაშვილი ბათუმის საქალაქო სასამართლოსთან მივიდა და განაცხადა, რომ მოსამართლეებს განაჩენი მზიასთვის კი არა, თავიანთი თავისთვის გამოაქვთ.
“მე ვფიქრობ, რომ მზია ციხეში ამათთვის ბევრად უფრო დიდი პრობლემაა, ვიდრე მზია გარეთ. ამას თავადაც ხვდებიან და გამოსავალს თუ იპოვიან, ძალიან კარგი იქნება და თუ ვერ იპოვიან, ეს მათი ცხოვრებისა და მმართველობის უმძიმესი ლაქა იქნება…
ქალი ციხეში უფრო მეტ სირთულესთან არის დაკავშირებული და მზია ამიტომ მეცოდება, თორემ სინამდვილეში, განაჩენი მზიასთვის კი არ გამოაქვთ, თავიანთი თავისთვის გამოაქვთ და უფრო მეტი, შთამომავლებისთვისაც კი. სირცხვილია“- განაცხადა არქიმანდიტრმა დოროთე ყურაშვილმა.
შეგახსენებთ, მზია ამაღლობელის საქმის გამოძება სისხლის სამართლის კოდექსის 353 პრიმა მუხლით მიმდინარეობს, რაც პოლიციელზე თავდასხმას გულისხმობს. მას 4-იდან 7 წლამდე თავისუფლების აღკვეთა ემუქრება.