ქვეყანაში ონლაინკაზინოების რეგულაციების გამკაცრებასა და სამომავლოდ აკრძალვასთან დაკავშირებით საქართველოს პრემიერ-მინისტრის ირაკლი ღარიბაშვილის მიერ გაკეთებულ განცხადებას, სამოქალაქო აქტივისტი, ნატა ფერაძე “ფეისბუქის” პირად გვერდზე ეხმაურება:
“სიცოცხლეში არც ონლაინ, არც ნამდვილ კაზინოში არ მითამაშია, (უბრალოდ არ მაინტერესებდა) და ბევრი ვიცი აზარტული თამაშებით დაღუპულიც, მაგრამ რა აკრძალვა, მიწისქვეშეთში გადაინაცვლებს და კიდე უარეს სახეს მიიღებს.
კაზინოების დაცვას დაგვაწყებინებენ ეს ნაძირლები”, – წერს ფერაძე სოციალურ ქსელში.
ცნობისთვის, საქართველოს მთავრობა ონლაინ კაზინოების მუშაობის წესების გამკაცრებას აპირებს. ამის შესახებ ირაკლი ღარიბაშვილმა მთავრობის სხდომის დაწყებამდე განაცხადა. პრემიერ-მინისტრის თქმით, ყოველწლიურად ქვეყნიდან ონლაინ კაზინოების მეშვეობით 1,5 მილიარდი ლარი გაედინება.
„ჩვენი მოქალაქეები, ჩვენი ახალგაზრდები ყოველდღე თამაშობენ ონლაინ კაზინოში და აგებენ ფულს. ეს თანხა შეადგენს 1,5 მილიარდ ლარს. ამის თაობაზე საუბარი მქონდა ეკონომიკურ გუნდთან და ვფიქრობ, რომ პირველ ეტაპზე ფინანსთა მინისტრი წარადგენს საკანონმდებლო ინიციატივას, რომელიც გულისხმობს გადასახადების გაზრდას ონლაინ კაზინოების მფლობელებისთვის. დღეს, მათი უმეტესობა უცხოური კომპანიაა და საუბედუროდ, ჩვენი მოქალაქეების ფული გაედინება უცხოეთში. აქედან დიდი ნაწილი – 99% არის გაჭირვებული მოსახლეობა – ისინი, ვინც არ მუშაობენ. ამიტომ, პირველ ეტაპზე ვფიქრობთ გაიზარდოს გადასახადები, აიკრძალოს რეკლამა და 25 წლამდე ავწიოთ ბარიერი და მეორე ეტაპზე საერთოდ უნდა აიკრძალოს ონლაინ კაზინოები“, – განაცხადა ირაკლი ღარიბაშვილმა.
მისივე თქმით, მთავრობა ამ საკითხზე აქტიურად იმუშავებს პარლამენტთან.