საქართველოს პრემიერ-მინისტრის ინიციატივას ონლაინ კაზინოების მუშაობის გამკაცრებასთან დაკავშირებით, ფსიქოლოგი ნათია ფანჯიკიძე “ფეისბუქის” პირად გვერდზე ეხმაურება:
“არამარტო კაზინოები, ჩემი აზრით, მაღაზიებიც უნდა დაიკეტოს. ფულს თუ ვერ დახარჯავ, მეტი გექნება და იქნები მდიდარი. ელემენტარული რამე რომ ასახსნელი იქნება, რთულს რანაირად გაიგებთ ხალხო? და სხვათაშორის, მეტი არგუმენტით რომ გავამყარო ჩემი ეს მოსაზრება, – შოპოჰოლიზმი სცდება თავის დაჯილდოების ნორმალურ დოზას და სწორედ ისევე აცარიელებს ჯიბეს და ამრავლებს ვალებს, როგორც კაზინოში წაგება. განსხვავება მხოლოდ ნივთების რაოდენობის გაზრდაშია. შედეგად, მარადგამოუყენებელი, არასაჭირო ნივთების სიჭარბის გამო საცხოვრებელ სივრცეში ადამიანის ადგილი აღარ რჩება. სახლს კაზინოში დაკარგავ, თუ მაღაზიებში ნავაჭრით გამოტენი და აღარ დაეტევი, რა მნიშვნელობა აქვს? თავიდან ბოლომდე თვითდესტრუქციული, მაშასადამე, ასაკრძალი ქმედებაა.
ინსტრუქცია: ეს არის ღლიცინა სტატუსი, ხუმრობა.
ასევე სერიოზულად: – მოზარდებში გეიმინგი არის წინაპირობა დამოკიდებულების პათოლოგიის განვითარების. მშობლებო, ამასაც მიაქციეთ ყურადღება. და გავიმეორებ, – ონლაინ კაზინოებზე რა თქმა უნდა, კატეგორიულად უნდა ვითხოვდეთ ბერკეტებს, რომელიც შეუძლებელს გახდის მოზარდის წვდომას.”, – წერს ფანჯიკიძე სოციალურ ქსელში.
იხილეთ მთავრობის მეთაურის განცხადება სრულად:
https://metronome.ge/story/382858