ზაფხულის მოსვლასთან ერთად ტკიპები მრავლდება, რაც არაერთი დაავადების გამომწვევი შეიძლება იყოს, მათ შორისაა ყირიმ-კონგოს ცხელება და ბორელიოზი.
აღნიშნულ თემაზე “მეტრონომი” ინფექციონისტ მაია ბუწაშვილს დაუკავშირდა.
როგორც ინფექციონისტმა განაცხადა, ტკიპებისგან თავდაცვისთვის დახურული ტანისამოსის ტარებაა მნიშვნელოვანი, განკაკუთრებით ბუნებაში.
“ტკიპების კბენისგან თავის დაცვის საშუალებაა, პირველ რიგში, ბუნებაში ყოფნის დროს, დახურული ტანისამოსის ტარება. კანი არ უნდა იყოს ღია. სასურველია შარვალი გვეცვას და გრძელმკლავიანი ტანსაცმელი, ბავშვების შემთხვევაში ეს განსაკუთრებით საყურადღებოა. სახლში დაბრუნების შემდეგ, საღამოობით უნდა დავათვალიეროთ კანი, რომ სადმე არ იყოს ჩამჯდარი ტკიპა. თუ ტკიპა ჩამჯდარია, არანაირი ზეთების და საცხების წასმა არ შეიძლება, რასაც ხალხი აკეთებს. პინცეტით უნდა ამოვიღოთ და მერე დავამუშავოთ სადეზინფექციო ხსნარით ან სპირტით.
ტკიპების ნაკბენი ბორელიოზს იწვევს. ბორელიოზი საკმაოდ სერიოზული დაავადებაა, შეიძლება ადამიანმა ტკიპის ნაკბენი ვერ დააფიქსიროს და პირდაპირ სიმპტომებით დაიწყოს. ბორელიოზს შეიძლება ახასიათებდეს ტემპერატურის მომატება, სახსრების და კუნთების ტკივილი და სპეციფიკური გამონაყარი, ე.წ. მიგრირებადი ერითემა, რომელიც არა მარტო გამონაყარის ადგილზე, არამედ სხვაგან შეიძლება იყოს და საჭიროებს გამოკვლევას, ოღონდ ტკიპის ნაკბენიდან 10-14 დღეში, მანამდე აზრი არ აქვს.” – განაცხადა ინფექციონისტმა მაია გუწაშვილმა.