ჟურნალისტი ნანუკა ჟორჟოლიანი “ფეისბუქის” პირად გვერდზე წერს, რომ ელენე ხოშტარიას ანალიზებმა უმძიმესი პასუხები აჩვენა. ამასთან ჟორჟოლიანის ინფორმაციით, ოპოზიციონერმა პოლიტიკოსმა გადაწყვეტილება მიიღო, შეწყვიტოს მედიკამენტების მიღება, რადგან მიხეილ სააკაშვილი ჯერ კიდევ არ გადაჰყავთ საავადმყოფოში.
“მეგობრებო, ელენეს ანალიზის უმძიმესი პასუხები აქვს. რაც არ უნდა იძახოს მხნედ ვარო, არაა ასე! ახლა, გადაწყვეტილება მიიღო საერთოდ შეწყვიტოს მედიკამენტები, რადგან მიშა ჯერ კიდევ არ გადაჰყავთ საავადმყოფოში. ელოდებიან, კიდევ როდის გაითიშება.
ირაკლი ღარიბაშვილი
ირაკლი კობახიძე
მამუკა მდინარაძე
მკვლელები ხართ!”, – წერს ჟორჟოლიანი სოციალურ ქსელში.
ცნობისთვის, პარტია “დროას” ლიდერი ელენე ხოშტარია, რომელიც მიხეილ სააკაშვილის მულტიპროფილურ კლინიკაში გადაყვანის მოთხოვნით უკვე მე-17 დღეა შიმშილობს, მედიკამენტოზურ მკურნალობას აჩერებს.
როგორც ხოშტარია სოციალურ ქსელში წერს, სანამ მისი მოთხოვნა არ შესრულდება, შიმშილობისგან გამოწვეული კრიტიკული მაჩვენებლების მკურნალობას არ გააგრძელებს.
გუშინ მთელი ღამე ველოდებოდი იმ კადრს ან ფრაზას, რომ გადაყავთ ამდენი ექიმის რეკომენდაციის და პანიკის შემდეგ. საბოლოო ჯამში ღამიდან დავასკვენი, რომ იმ დროს, როცა სააკაშვილის თავში და არამარტო, მიდის საშიში პროცესები და კრიტიკულ რამდენიმე საათში გამოკვლეულიც კი არ არის ბოლომდე.
დრო არათუ აღარაა, შეიძლება დაგვიანებულია.
ამიტომ მე გადავწყვიტე, რომ ვაჩერებ მედიკამენტოზურ მკურნალობას კრიტიკული მაჩვენებლების წინააღმდეგ და სანამ არ გადაიყვანენ არაფერს არ გადავისხამ და არ მივიღებ.
მე სხვა გზა არ მაქვს. ვერ ვიჯდები უმოქმედოდ გადამწყვეტ წუთებში
გადაიყვანეთ სააკაშვილი კლინიკაში სასწრაფოდ!”, – წერს ხოშტარია “ფეისბუქზე”.
ცნობისთვის, ექს-პრეზიდენტის ჯანმრთელობის მდგომარეობა 18 ნოემბერს დამძიმდა. როგორ ადვოკატებმა აღნიშნეს, მიხეილ სააკაშვილი “მოწყვეტით დაეცა” და გონება დაკარგა. არსებული ინფორმაციით, ის რეანიმაციულ განყოფილებაში რჩება.