საქართველოს მე-3 პრეზიდენტი, მიხეილ სააკაშვილი სოციალურ ქსელში განცხადებას ავრცელებს. იგი ეხმიანება თეა წულუკიანის მიერ გაკეთებულ განცხადებას, სადაც ამბობს, რომ სააკაშვილის პრეზიდენტობის დროს უფრო მეტი ადამიანი მოკლეს, ვიდრე მამამისის, მოსამართლე ავთანდილ წულუკიანის დროს.
“სწორედ მე დავარწმუნე შევარდნაძე, დათანხმებულიყო ევროპის საბჭოს მოთხოვნას და სიკვდილით დასჯაზე მორატორიუმის წინადადებით შემოსულიყო პარლამენტში და უკვე იქ ბიუროს სხდომაზე, მე ყველასთვის მოულოდნელად შევუცვალე ამ კანონპროექტს სახელი და დავარქვი ” კანონი სიკვდილით დასჯის სამუდამო გაუქმებაზე საქართველოში”. პრეზიდენტის საპარლამენტო მდივანმა, ჯონი ხეცურიანმა კი თავის თავზე აიღო პრეზიდენტის ვეტოს თავიდან აცილება.
უფრო მოგვიანებით, პრეზიდენტობის დროს, მე და დათო საყვარელიძემ, ყველანაირი ხერხის გამოყენებით, მალაიზიას გამოვგლიჯეთ სიკვდილით დასასჯელად განწირული ორი ქართველი ქალბატონი” – წერს მიხეილ სააკაშვილი.