აშშ-ის მუდმივმა წარმომადგენელმა ნატოში, მეთიუ უიტაკერმა ტელეარხ Fox Business-ის ეთერში განაცხადა, რომ ჩინეთმა უნდა აგოს პასუხი რუსეთის მიერ უკრაინაში მიმდინარე ომის “სუბსიდირების” გამო.
„ჩინეთი თვლის, რომ ომს აწარმოებს რუსეთის მეშვეობით. ჩინეთის მთავრობის განცხადებებში ვხედავთ მცდელობას, ამ ომით დაგვკავონ – როგორც აშშ, ისე ჩვენი მოკავშირეები, რათა ვერ შევძლოთ სხვა სტრატეგიულ ამოცანებზე კონცენტრირება“, – თქვა მან.
უიტაკერის თქმით, პეკინი შეცდა, როდესაც გადაწყვიტა, დახმარებოდა მოსკოვს. უიტაკერმა ჩინეთის დასჯისკენ მოუწოდა იმ დახმარების გამო, რომელიც, მისი განცხადებით, უკრაინელების მკვლელობას უწყობს ხელს.
„ვფიქრობ, მათ უნდა მოვთხოვოთ პასუხი იმაზე, რომ აფინანსებენ იმ მკვლელობებს, რაც უკრაინის საბრძოლო ველებზე ხდება, – ხაზი გაუსვა აშშ-ის წარმომადგენელმა ნატოში.
გარდა ამისა, უიტაკერმა შეახსენა საზოგადოებას, რომ ვაშინგტონი აპირებს მეორადი სანქციების დაწესებას იმ ქვეყნებზე, რომლებიც რუსეთის ნავთობს ყიდულობენ, იმ შემთხვევაში, თუ მოსკოვი 50 დღის განმავლობაში არ დადებს სამშვიდობო შეთანხმებას უკრაინასთან.
მეორადი სანქციები სერიოზული იქნება და შეეხება ყველა იმ ქვეყანას, რომელიც ყიდულობს რუსულ ნავთობს – იქნება ეს ჩინეთი, ინდოეთი თუ ბრაზილია“, – განაცხადა მეთიუ უიტაკერმა.