აშშ-ის ეროვნული არქივის ვებგვერდზე ამჟამინდელი პრეზიდენტის, დონალდ ტრამპის ადმინისტრაციამ გაასაჯაროვა უფლებადამცველი აქტივისტის, მშვიდობის დარგში ნობელის პრემიის ლაურეატის, მარტინ ლუთერ კინგის მკვლელობასთან დაკავშირებული დოკუმენტები.
ლუთერ კინგის ორმა შვილმა დაგმო მამის მემკვიდრეობისთვის ძირის გამოსათხრელად აღნიშნული დოკუმენტების ნებისმიერი გამოყენების მცდელობა.
„ვთხოვთ ყველას, ვინც ჩართულია ამ ფაილების გამოქვეყნებაში, გააკეთონ ეს ემპათიით, თავშეკავებითა და პატივისცემით ჩვენი ოჯახის გლოვისადმი, რომელიც გრძელდება. ამ დოკუმენტების გამოქვეყნება უნდა იქნას განხილული სრულ ისტორიულ კონტექსტში. მამაჩვენი ცხოვრების განმავლობაში მუდმივად იყო ედგარ ჰუვერის მიერ გამოძიების ფედერალური ბიუროს საშუალებით ორკესტრირებული აგრესიული, მტაცებლური და ღრმად შემაშფოთებელი დეზინფორმაციისა და თვალთვალის კამპანიის სამიზნე“, – ნათქვამია კინგის შვილების – მარტინ მესამის და ბერნისის – განცხადებაში.
ამასთან, აშშ-ის გენერალურმა პროკურორმა, პემ ბონდიმ განაცხადა, რომ „ამერიკელი ხალხი იმსახურებს პასუხებს ამერიკელი ერის ერთ-ერთი უდიდესი ლიდერის საშინელი მკვლელობიდან ათწლეულების შემდეგ.“
შეგახსენებთ, კინგის მკვლელობის მასალები 1977 წლიდან იყო გასაიდუმლოებული.
მარტინ ლუთერ კინგი 39 წლის ასაკში, 1968 წლის 4 აპრილს მემფისში მოკლეს.
მას იმ დროს ესროლეს, როდესაც ერთ-ერთი სასტუმროს აივანზე იდგა. მკვლელობის ბრალდებით 1969 წელს გაასამართლეს კრიმინალური წარსულის მქონე ჯეიმს ეარლ რეი, რომელმაც დანაშაული აღიარა, თუმცა მოგვიანებით აღიარება უარყო.
მას 99 წლით თავისუფლების აღკვეთა მიუსაჯეს.