მსახიობმა და ტელეწამყვანმა კახა კინწურაშვილმა “ფეისბუქის” პირად გვერდზე ქვეყანაში მიმდინარე პროცესებთან დაკავშირებით პოსტი გამოაქვეყნა, სადაც აღნიშნავს, რომ “ქართული ოცნების” ხელისუფლება საზოგადოებაში სიძულვილსა და შურისძიების სურვილს აღვივებს.
“სამართლებრივად ბევრი გზა ჰქონდა “ოცნების” ხელისუფლებას, რომ გამჭირვალე პროცესი ეჩვენებინა საზოგადოებისათვის, მაგრამ ყველაზე მდაბიო გზა არჩია. აღვივებს ღვარძლს, სიძულვილს და შურისძიების სურვილს. ყველა ქმედებით ცდილობს გამოაცალოს ხალხს რაციონალური განსჯის სივრცე და დატოვოს ადამიანები სიძულვილთან და შურისძიების სურვილთან ერთად, მარტო.
ამ სიძულვილმა ადამიანები “ტროლების”ენაზე აალაპარაკა. ერთმანეთს ატოლებენ ვისი დანაშაული უფრო მძიმეა და შურისძიების სურვილს კანონზე და ქვეყნის კეთილდღეობაზე მაღლა აყებებენ.
გულწრფელად ვუთანაგრძნობ იმ ადამიანებს, ვისაც წინა (თუ დღევანდელი) ხელისუფლება უსამართლოდ მოექცა და ამ ხელისუფლებამ ღვარძლიანი მარტოობისთვის გაწირა.
სანამ პრიორიტეტი კანონიერი სამართლიანობის მოთხოვნა არ გახდება, (ნებისმიერ ადამიანზე )მანამდე ვიქნებით “ტროლების” საზოგადოება. ამით კი ჩვენს თავს და მომავალ თაობას ვართმევთ მშვიდობიან და თავისუფალ სახელმწიფოში ცხოვრების პერსპექტივას!”, – წერს კახა კინწურაშვილი სოციალურ ქსელში.