როგორია გორში დაჭრილი პოლიციელების ჯანმრთელობის მდგომარეობა – დაზიანებები სამ სამართალდამცველს ცივი იარაღით მიაყენეს.
შინაგან საქმეთა მინისტრმა, გორში მომხდარი თავდასხმის შედეგად დაჭრილი პოლიციელები მოინახულა. ცივი იარაღით დაზიანებები სამ სამართალდამცველს მიაყენეს.
შინაგან საქმეთა სამინისტროს ცნობით, პოლიციამ ავტომობილი გააჩერა, რა დროსაც გაირკვა, რომ მანქანას მართავდა არასრულწლოვანი, მან სამართალდამცველებს წინააღმდეგობა გაუწია, დაპირისპირებაში მოზარდის მამა და ნათესავებიც ჩაერთნენ. დაკავებულია 5 პირი.
დაშავებული პოლიციელები კლინიკაში გადაიყვანეს. როგორც ექიმი აცხადებს, პაციენტების მდგომარეობა ამჟამად სტაბილურია:
“სტაციონარში, სხეულის არეში ჭრილობებით შემოყვანილია ორი პაციენტი, ორივესთან ჩატარებულია ოპერაციული მკურნალობა. ამჟამად მდგომარეობა სტაბილურია, შეესაბამება გადატანილი ოპერაციის სირთულეს, უტარდებათ პოსტ ოპერაციული მკურნალობა და ორივე ქირურგიულ განყოფილებაში იმყოფება”, – აცხადებს ექიმი.
შსს-ს შიდა ქართლის დეპარტამენტის უფროსმა, მომხდარის დეტალებზე ისაუბრა:
“შიდა ქართლის პოლიციის თანამშრომლებს, რომლებიც სამსახურებრივ მოვალეობას ასრულებდნენ, გორის სოფელ ხელთუბანში თავს რამდენიმე მოქალაქე დაესხა და ცივი იარაღის, კერძოდ დანისა და ცულის გამოყენებით მიაყენეს მათ სხვადასხვა დაზიანება. აღნიშნულ ფაქტზე დაკავებულია 5 პირი, დაშავებული პოლიციელები კი კლინიკაში იმყოფებიან. ამჟამად მათი მდგომარეობა საბედნიეროდ სტაბილურია. ყველა პოლიციის თანამშრომელი იყო ფხიზელი, ამას სრული პასუხისმგებლობით ვაცხადებ”, – აღნიშნავს შსს-ს შიდა ქართლის დეპარტამენტის უფროსი კახა ბუხრაშვილი.
მომხდარზე გამოძიება სისხლის სამართლის კოდექსის 353-ე პრიმა მუხლის მეორე ნაწილით მიმდინარეობს.