“ერთიანობა ნაციონალური მოძრაობის” პოლიტიკური მდივნის გიორგი ბარამიძის განცხადებით, დღეს, 20 ივნისთან დაკავშირებით, რუსთაველის გამზირზე ჩატარებული გამოძიება “ქართული ოცნების” მორიგი სპექტაკლი იყო.
მისი თქმით, გამოძიების მიზანია, რომ “შეტენონ” და ისრები გადაიტანონ მხოლოდ გიორგი გახარიაზე”.
“მორიგი სპექტაკლი, რომ ვითომ რაღაცას იძიებენ, თუმცა ამ წუთას აწყობთ იმიტომ, რომ უნდათ, რომ ისრები და დანაშაული თავიდან ბოლომდე “შეტენონ”, უნდათ რომ ისრები გადაიტანონ მხოლოდ გახარიაზე.
გახარიას თავისი პასუხიმგებლობა აქვს, ბუნებრივია, როგორც [ყოფილ] შინაგან საქმეთა მინისტრს, მაგრამ სხვები ვერ გაექცევიან ამ პასუხისმგებლობას, რომლებმაც ჩაიდინეს სახელმწიფო ღალატი და ასევე, რომლებიც იყვნენ ჩართულები, ჩვენი ინფორმაციით, სხვადასხვა ძალოვანი სტრუქტურების წარმომადგენლები ივანიშვილის მითითებით, ამ დარბევის დღეს, როდესაც ვითომ სახელმწიფო გადატრიალების მცდელობას ებრძოდნენ და ვითომ შტურმი იყო და პარლამენტიდან ბევრი მეტრის და შეიძლება კილომეტრის იქით სდიეს ხალხს,” – განაცხადა გიორგი ბარამიძემ.
ცნობისთვის, საქართველოს პროკურატურის ინფორმაციით, ადამიანის უფლებათა ევროპულმა სასამართლომ 2019 წლის 20-21 ივნისის მოვლენებთან დაკავშირებით, პროცედურულ ნაწილში კონვენციის მე-3 მუხლის დარღვევა დაადგინა და სახელმწიფოს გარკვეული საგამოძიებო მოქმედებების ჩატარება დაავალა. აღნიშნულთან დაკავშირებით უწყება განცხადებას ავრცელებს, რომელშიც განმარტავს, რომ სტრასბურგის სასამართლოს გადაწყვეტილების და რეკომენდაციების გათვალისწინებით, რუსთაველის გამზირზე საგამოძიებო მოქმედებები ტარდება.