“ყველა შვილმკვდარ ქალს მოვუწოდებ, რომ დადგეს გიული ალასანიას გვერდით. სახელმწიფოს არ უნდა მივცეთ უფლება, რომ როგორც ჩვენ ვისხედით ჩვენი შვილების კუბოების წინ, ისიც ასე დაჯდეს”, – ამის შესახებ ჟურნალისტმა მაია ასათიანმა “მთავარი არხის” ეთერში საუბრისას განაცხადა.
“მოვდიოდი თქვენთან და მახსენდებოდა ირინა ენუქიძე, ეს იყო დიდი ადამიანი, მართლა ძალიან ღირსეული, შვილმკვდარი ქალი, რომელსაც დიახ, შვილი მოუკლეს. ჩვენ შვილმკვდარ ქალებს, არცერთს არ გვინდა, სხვა ქალი ვიხილოთ საკუთარი შვილის კუბოსთან, აი, ეს გვაერთიანებს. ირინა ენუქიძე ახლა ცოცხალი რომ ყოფილიყო, დღეს იდგებოდა გიული ალასანიას გვერდით, მე ამის მჯერა. იმიტომ, რომ კბილი კბილის წილ და სისხლი სისხლის წილ ჩვენ, საზოგადოებად კი არ გვაქცევს, არამედ, გვაქცევს ველურ ტომად. ეს მინდა ვუთხრა ჩემნაირ ქალებს, რომლებიც შურისძიების ძახილით არიან გარეთ გამოსულები, რით განსხვავდებით თქვენი შვილის მკვლელებისგან?! – იმ ხალხს მინდა მივმართო, ვინც სახლში ზის და სეირს უყურებს, ასე შეხედეთ, – ქალს შვილს უკლავენ!
მე ყველა შვილმკვდარ ქალს მოვუწოდებ, რომ დადგეს გიული ალასანიას გვერდით, იმიტომ, რომ მეორე ირინა ენუქიძე გამახსენა ამან… იმიტომ, რომ ეს ქალი იბრძვის თავისი შვილისთვის და ჩვენ აი, ამ შავოსანმა ქალებმა (მეც ასეთი ქალი ვარ სინამდვილეში) სახელმწიფოს არ უნდა მივცეთ უფლება, რომ როგორც ჩვენ ვისხედით ჩვენი შვილების კუბოების წინ, ისიც ასე დაჯდეს. სირცხვილია ხალხო!” – განაცხადა მაია ასათიანმა.