ექს-პრეზიდენტ მიხეილ სააკაშვილის განცხადებით, რუსთავის #18 დაწესებულებაში გადასვლისას ციხის ერთ-ერთმა თანამშრომელმა უთხრა: “აჰა, ჩიტო, ხომ ჩაგიგდეთ ხელში”. მისივე განცხადებით, მოითხოვა ამ ადამიანის სახელი და გვარი, თუმცა უარი უთხრეს. ამის შესახებ აღნიშნულია წერილში, რომელიც ნიკა გვარამიამ პირდაპირ ეთერში წაიკითხა.
აღნიშნულს ჟურნალისტი ელისო კილაძე “ფეისბუქის” პირად გვერდზე შემდეგნარიად ეხმაურება:
“ჩიტო, ხომ ჩაგიგდეთ ხელშიო და თან გინება ვინც მიაყოლა პატიმარ სააკაშვილს, – ამ ჯალათის გვარი უნდა გავიგო და მსოფლიოს უნდა გავაგებინო!
შენ კი ვინც ხარ ერთ რამეს გეტყვი-ბუმერანგია ცხოვრება! შენზე კუნთმაგარი ზონდერები მუშაობდნენ მაგ ციხეში და ზოგი გაქცეულია,ზოგიც საკანში ზის!”, – წერს კილაძე სოციალურ ქსელში.
ამასთან, მიხეილ სააკაშვილის განცხადებით, მასზე ფიზიკურად იძალადეს, კერძოდ, მანქანიდან იძულებით გადაიყვანეს და კისერში რამდენჯერმე ჩაარტყეს. ექს-პრეზიდენტი წერს, რომ სწორედ ამ დროს გაუწია წინააღმდეგობა.
“გაფრთხილების გარეშე დაიწყეს ჩემი გადმოთრევა, მიუხედავად ჩემი კატეგორიული უარისა. გადმომათრიეს მანქანიდან, კრიმინალების გინების ქვეშ, გამათრიეს მიწაზე და რამდენჯერმე ჩამარტყეს კისერში. მითრიეს თმებით და რა თქმა უნდა, ამ დროს გავუწიე წინააღმდეგობა”, – წერს სააკაშვილი.
გუშინ, 8 ნოემბერს, საღამოს, ყოფილი პრეზიდენტი გლდანის #18 სამკურნალო დაწესებულებაში გადაიყვანეს. თითქმის ერთი საათის განმავლობაში უცნობი იყო თუ სად და რა ვითარებაში წაიყვანეს მიხეილ სააკაშვილი.
როგორც ექს-პრეზიდენტი ამბობს, ის გლდანის ციხეში მოტყუებით გადაიყვანეს. ეს ინფორმაცია პირველად სახალხო დამცველმა ნინო ლომჯარიამ გააჟღერა. პენიტენციური სამსახურის მიერ გავრცელებული კადრებიდანაც ჩანს, რომ სააკაშვილი თავისი ხელით ალაგებს პირად ნივთებს და ტოვებს დაწესებულებას.
იუსტიციის მინისტრის რატი ბრეგაძის განცხადებით, მიხეილ სააკაშვილმა უწყების თანამშრომლებს ფიზიკური და სიტყვიერი შეურაცხყოფა მიაყენა. რომლის თანახმადაც, სააკაშვილმა ასევე ძვირადღირებული სამედიცინო ტექნიკაც დააზიანა. ამ ფაქტს ბრეგაძის თქმით, გენერალური ინსპექცია სწავლობს, რაზეც შესაბამისი რეაგირება იქნება. მისივე მტკიცებით, რუსთავის ციხიდან გლდანში გადაყვანისას არცერთი პროცედურა და ნორმა არ დარღვეულა.