“მთავარი არხის” ჟურნალისტები ყველგან არიან პატრულის მხრიდან დევნის ობიექტები, ასევე, შევიწროების ობიექტები უბნის წინ გაურკვეველი ადამიანების მხრიდან. რაც ყველაზე სამწუხაროა, აქტიური ხელშეშლა შეინიშნება ტელეკომპანია POSTV -ის მხრიდან – ამის შესახებ “მთავარი არხის” გენერალურმა დირექტორმა, ნიკა გვარამიამ ბრიფინგზე განაცხადა.
მან კონკრეტული მედიის წარმომადგენლებს მოუწოდა, რომ “ნუ გადაიქცევიან ზონდერებად”.
“ჩვენ დავაფიქსირეთ რამდენიმე შემთხვევა, განსაკუთრებით აქტუალურია ეს საკითხი სენაკში, სადაც მუშაობს ემა გოგოხია. ეს ჟურნალისტი არ არის სინამდვილეში ჟურნალისტი, ის არ წარმოადგენს POSTV-ის საინფორმაციო სამსახურს, ის წარმოადგენს ე.წ. “პროდაქშენს”. საქმე იმაშია, რომ POSTV-ის ყველგან ჰყავს საინფორმაციო ჯგუფები და ისინი მუშაობენ ჩვეულებრივ, როგორც ჟურნალისტმა უნდა იმუშაოს, მაგრამ ასევე ყველგან არის POSTV-ის ბეჯით ადამიანი, რომელთა უმრავლესობა, ჩვენი ინფორმაციით, POSTV-ის თანამშრომელია, მაგრამ არა საინფორმაციო სამსახურის.
მე მოვუწოდებ ყველა მედიას, სამთავრობო მედიას ვგულისხმობ, ნუ გადაიქცევიან პირდაპირი მნიშვნელობით ზონდერებად და ნუ უშლიან საკუთარი კოლეგების საქმიანობას ველზე. წინააღმდეგ შემთხვევაში ჩვენ იძულებული ვიქნებით, მივმართოთ სამართალდამცავ ორგანოებს ჟურნალისტურ საქმიანობაში ხელშეშლის თაობაზე. არანაირი მნიშვნელობა არ აქვს ამას მიკროფონიანი ადამიანი აკეთებს თუ ხელკეტით შეიარაღებული”, – განაცხადა გვარამიამ.