თბილისის მერმა, კახა კალაძემ მედიასთან „კოალიცია ცვლილებისთვის“ ლიდერის, ნიკა მელიას შესახებ გააკეთა კომენტარი.
„ნიკა მელია დაჭერილი კაცია და არ მინდა, რაღაც ისე გამომივიდეს დაკავებულ ადამიანზე. მისი საქციელი და ქმედებები, რა თქმა უნდა, არაადეკვატურია. ის იმ რადიკალური დაჯგუფების წარმომადგენელია, რომელიც გარედან იმართება. როდესაც გიბარებენ პარლამენტში და არ ცხადდები, რა თქმა უნდა, ის რეაგირება მოჰყვება, რაც კანონითაა გაწერილი. შესაბამისად, ყველა ის ადამიანი, ვინც არ გამოცხადდა აღნიშნულ კომისიაზე, ყველა შემთხვევაში იქნება ის რეაგირება, რაც არის გათვალისწინებული.
მსგავსი ქმედებები [მოსამართლისთვის წყლის შესხმა] კატეგორიულად მიუღებელია. არაერთი ფაქტი გვინახავს, მაგალითად, დეპუტატზე ხელის დარტყმა, დეპუტატისთვის შეურაცხყოფის მიყენება. ამას კონკრეტული ტელევიზიების მხრიდან ძალიან დიდი პოზიტივი მოჰყვება ხოლმე. ახალისებენ ამ ყველაფერს. ამ კონკრეტულ ტელევიზიებს აღარ ჩამოვთვლი. ეს კატეგორიულად მიუღებელია. ბევრჯერ მითქვამს და კიდევ ერთხელ გავიმეორებ, რომ ამ ტიპის ქმედებები – ძალადობა, ძალადობისკენ მოწოდება, ეს კატეგორიულად მიუღებელია და ძალიან მძიმე შედეგამდე მიგვიყვანს ეს ყველაფერი. შესაბამისად, მიუხედავად პოლიტიკური შეხედულებებისა, დამოკიდებულებებისა, ვფიქრობ, ყველა უნდა გავერთიანდეთ. მძიმე შედეგებს მივიღებთ, რადგან ძალადობას ყოველთვის მოჰყვება ძალადობა“, – განაცხადა კალაძემ.
შეგახსენებთ, ნიკა მელია 29 მაისს, ადმინისტრაციული სამართალდარღვევის მოტივით, დააკავეს.
30 მაისს, საგამოძიებო კომისიაზე გამოუცხადებლობის გამო დაკისრებული გირაოს არგადახდის მიზეზით, მას პატიმრობა შეეფარდა.