სტამბოლში რუსეთისა და უკრაინის დელეგაციებს შორის მოლაპარაკებების მეორე რაუნდი დასრულდა.
უცხოური მედიის ინფორმაციით, შეხვედრაზე განიხილებოდა ცეცხლის შეწყვეტასთან დაკავშირებული დეტალები, ასევე გაიჟღერა იდეამ, დაპირისპირებული მხარეების ლიდერების შეხვედრასთან დაკავშირებით.
გარდა ამისა, რუსეთმა და უკრაინამ პატიმრების გაცვლის საკითხი განიხილეს.
“დელეგაციებმა დოკუმენტები გაცვალეს. მზადდება ტყვეთა ახალი გაცვლა” – განაცხადა უკრაინის პრეზიდენტმა, ვოლოდიმირ ზელენსკიმ
უკრაინული მედია ანდრეი ერმაკზე დაყრდნობით წერს, რომ უკრაინის დელეგაციამ რუსულ მხარეს ბავშვების სია გადასცა, რომლებიც სამშობლოში უნდა დაბრუნდნენ.
“ველით პასუხს, ბურთი ახლა რუსეთის მოედანზეა,” ამბობს ერმაკი. მოლაპარაკებების შესახებ ოფიციალური განცხადებები ამ დროისთვის არ გავრცელებულა.
ცნობისთვის, უკრაინის დელეგაციას ხელმძღვანელობდა თავდაცვის მინისტრი, რუსტემ უმეროვი.
დელეგაციის შემადგენლობაში ასევე შედიან უკრაინის პრეზიდენტის ადმინისტრაციის ხელმძღვანელის მრჩეველი ალექსანდრ ბევზი, უკრაინის შეიარაღებული ძალების საზღვაო ძალების სარდლობის შტაბის უფროსის მოადგილე ალექსანდრ დიაკოვი, უკრაინის საგარეო საქმეთა მინისტრის პირველი მოადგილე სერგეი კისლიცა და სხვები.
რაც შეეხება რუსეთს, მათ შემადგენლობაში არიან ის წევრები, რომლებიც პირველი რაუნდის მოლაპარაკებებში მონაწილეობდნენ – დელეგაციას პრეზიდენტის თანაშემწე ვლადიმერ მედინსკი ხელმძღვანელობს, დელეგაციის შემადგენლობაში ასევე შედიან : საგარეო საქმეთა მინისტრის მოადგილე, მიხაილ გალუზინი, რუსეთის შეიარაღებული ძალების გენერალური შტაბის მთავარი სადაზვერვო სამმართველოს ხელმძღვანელი, იგორ კოსტიუკოვი და თავდაცვის მინისტრის მოადგილე, ალექსანდრ ფომინი.