„კოალიცია ცვლილებისთვის“ ლიდერმა, ნიკა გვარამიამ. თანაპარტიელ ნიკა მელიას გუშინდელ დაკავებასთან დაკავშირებით, მედიასთან კომენტარი გააკეთა.
„გუშინ ვილაპარაკეთ დიდი ხანი. ნიკასგან გავიგე ის ამბები რაც მოხდა. მელიას საერთოდ არ შეუგინებია, ხმის ამოღებაც ვერ მოასწრო ისე სწრაფად მოხდა ყველაფერი. ჩატენეს “მარშუტკაში” და არა პატრულის მანქანაში. მარტივად რომ ვთქვათ, ჩვენ გვაქვს საქმე წინმსწრებ დაჭერასთან. პოლიტიკური პატიმრობა ახალი არ არის ნიკა მელიასთვის. ჩვენ ამისთვის მზად ვართ, ატანა ყველას შეგვიძლია. კი არ ველოდებით, არამედ მზად ვართ“, – განაცხადა გვარამიამ.
შეგახსენებთ, მელია გვიან ღამით, ლისის ტბის ასახვევთან დააკავეს.
ინფორმაცია ამის შესახებ კოალიციის პრესსამსახურმა გაავრცელა. მელია სატელევიზიო გადაცემაში – „ორ ცეცხლს შუა“ – მონაწილეობის მიზნით მიემართებოდა.
როგორც კოალიციის პრესსამსახურის წარმომადგენელი მირანდა ბაღათურია ამბობს, მისი ავტომობილი საპატრულო პოლიციამ გააჩერა, ხოლო მალევე ადგილზე დაახლოებით 100-მდე სამოქალაქო ფორმაში ჩაცმული პირი, მათ შორის კრიმინალური პოლიციის წარმომადგენლები, გამოჩნდნენ. დაცვის წევრებს წაართვეს ტელეფონები, ამოიღეს ჩიპები და გადააგდეს. მელია ძალის გამოყენებით ავტომობილიდან გადმოიყვანეს და სამარშრუტო ტაქსით წაიყვანეს.
შინაგან საქმეთა სამინისტროს ცნობით, ნიკა მელია დაკავებულია ადმინისტრაციულ სამართალდარღვევათა კოდექსის 173-ე მუხლით, რაც გულისხმობს სამართალდამცავთა სიტყვიერ ან/და სხვაგვარ შეურაცხმყოფელ ქმედებას მათი სამსახურებრივი მოვალეობის შესრულებისას.