“ქართული ოცნების” მიერ დაანონსებულ აქციასთან დაკავშირებით, რომელიც დღეს, 27 ოქტომბერს თავისუფლების მოედანზე გაიმართება, სამცხე-ჯავახეთის რწმუნებულის მოადგილემ, მომღერალმა ზურა ხაჩიძემ “მიქსმეტრონომთან” ისაუბრა.
როგორც ხაჩიძემ განაცხადა, აქციაზე მისვლის მისი ერთ-ერთი მთავარი მიზანია, რომ “ნაციონალური მოძრაობის” მხარდამჭერებმა დაინახონ, თუ რამდენი ადამიანი დგას “ქართული ოცნების” გვერდით და უარს ეუბნება ოპოზიციურ პარტიას, კერძოდ “ნაციონალურ მოძრაობას”
“მთელს მსოფლიოში აპრობირებული მეთოდია, როდესაც საარჩევნო კამპანია სრულდება მმართველ პარტიას, თუ ოპოზიციას (არ აქვს მნიშვნელობა) შეუძლია შემაჯამებელი აქცია გამართოს.
ძალიან მნიშვნელოვანია მსოფლიომ დაინახოს, რომ ქართველი ხალხი დგას მმართველი გუნდის გვერდით და აპროტესტებს წინა ხელისუფლების რეჟიმს, ქვეყნის არასწორი მართვის მეთოდებს…
პირველ რიგში, იმიტომ მივდივარ აქციაზე, რომ იმ ხალხმა, ვინც მხარს “ნაციონალურ მოძრაობას” უჭერს, დაინახოს – რამდენი ვართ ჩვენ, საქართველოს მოსახლეობა, რომელიც გვერდით უდგას “ქართულ ოცნებას”, ქვეყნის სტაბილურ განვითარებას, სიმშვიდეს და გვერდით უდგას იმას, რომ კიდევ ოთხი წელი ქვეყანა მართოს “ქართულმა ოცნებამ” და ის წარმატებული პროექტები, რომელიც 2012 წლიდან დავიწყეთ, ბოლომდე მივიყვანოთ”, – განუცხადა ხაჩიძემ “მიქსმეტრონომს”.
ცნობისთვის, დღეს, 27 ოქტომბერს ხელისუფლებაში “ქართული ოცნება” აქციას მართავს. პარტიის თავმჯდომარემ, ირაკლი კობახიძემ მხარდამჭერებს თბილისში, თავისუფლების მოედანზე შეკრებისკენ მოუწოდა.
მმართველი გუნდის ცნობით, თავისუფლების მოედანზე პარტიის მხარდამჭერების შემაჯამებელი საარჩევნო შეკრება 17:00 საათზე გაიმართება.
https://mix.metronome.ge/22860-2/