მიმდინარე აქციებისას დაპატიმრებული რევაზ კიკნაძის ადვოკატმა, ელგუჯა ავსაჯანიშვილმა „პუბლიკას“ მისი დაცვის ქვეშ მყოფის აუდიოჩანაწერი მიაწოდა, სადაც ბრალდებული საპატიმროში თავს გადამხდარ ამბავს ჰყვება.
„კარცერში, 3 დღე-ღამე გავატარე. შემოწმებააო აბანოში გადითო, მეთქი რატომ უნდა გავიდე, წინაზე რომ გავედი ცუდი რაღაცები მოხდა და ახლა არ გავალ მეთქი. მერე დავრჩი ოთახში და შემოვარდნენ ღორებივით, გიჟებივით ჩამოგლიჯეს თოკები […] ესო რამდენს ლაპარაკობსო და კარცერში ჩავიყვანოთო, ეს იყო და ეს. საერთოდ შეურაცხყოფაც არ მიმიყენებია ისე მეჭიდავებოდა […] იქ არ ვჭამდი საჭმელს, მშიერ-მწყურვალი ვიყავი, ტუალეტში არ ვჭამ-მეთქი საჭმელს…
მესამე დღეს მოვიდნენ სხვა საკანში უნდა გადაგიყვანოთო. ახალ საკანში ჩამსვეს ახლა – მე, ონისე და ერთი კაი ბიჭი ვართ და მშვენივრად ვართ. წინა საკანშიც მშვენივრად ვიყავი…
მე, სადაც არ უნდა ჩამსვან, კარგად ვიქნები, მაგრამ ამათ უსამართლობას მე არ მოვითმენ და თვალს არასდროს არ დავუხუჭავ.
ამათმა კარცერში კი არა კუბოშიც რომ ჩამსვან, ჩემზე თავისუფლები მაინც ვერ იქნებიან“, – ამბობს კიკნაძე.
შეგახსენებთ, რევაზ კიკნაძეს ჯგუფურ ძალადობას ედავებიან. მას 4-დან 6 წლამდე პატიმრობა ემუქრება.